ક્રાઈમ:પતિએ શંકા રાખી પત્નીને કુહાડીના ઘા ઝીંકી પતાવી દીધી

ડાંગ જિલ્લાના વઘઇ તાલુકાના ઢાઢરા ગામે વચલા ફળિયામાં રહેતા વૃદ્ધે બુધવારે સવારે તેની પત્નીના બીજા પુરુષ સાથે સંબંધ હોવાની શંકા રાખી પત્નીને ગળા તેમજ માથાના ભાગે કુહાડીના ઉપરાઉપરી ઘા ઝીંકી હત્યા કરતા ચકચાર મચી ગઇ હતી.

પોલીસ સૂત્રો પાસેથી પ્રાપ્ત માહિતી મુજબ ડાંગ જિલ્લાના વઘઇ તાલુકાના ઢાઢરા ગામે વચલા ફળિયામાં રહેતા વૃદ્ધ મંગુભાઈ ફુલ્યાભાઈ સિંગાડએ બુધવારે સવારે 9 કલાકે તેમની પત્ની સારજુબેન (ઉ.વ. 55) પર શંકા રાખી પોતાના ઘરે જ તેઓએ ઝપાઝપી કરી ઝઘડો કર્યો હતો .જે ઝઘડો ઉગ્ર બનતા રોષે ભરાયેલા પતિ મંગુભાઇએ ઘરમાં પડેલી કુહાડીથી સારજુબેનના માથા અને પીઠનાં ભાગે બે-ત્રણ ઘા ઝીંકી દેતા તેણીનું ગંભીર ઇજાને પગલે ઘટનાસ્થળે મોત નીપજયું હતું. આ બનાવ બાબતે મૃતકની દિકરી અરૂણાબેને વઘઇ પોલીસ મથકે ફરિયાદ નોંધાવતા વઘઈ પોલીસ ફરિયાદનાં આધારે ઘટનાસ્થળે પહોંચી આરોપી પતિ મંગુભાઇ સિંગાડની ધરપકડ કરી કલમ-302 હેઠળ ગુનો નોંધી વઘઇ પીએસઆઈ ડી.ડી.વસાવાએ તપાસ હાથ ધરી હતી.