માંગણી:કોઈન્તિયાના એસ.ટી. રૂટો શરૂ કરવા સરપંચની માગ, 1 વર્ષથી તમામ રૂટ બંધ કરાયા

કોરોના મહામારીના કારણે લોકડાઉન દરમિયાન કોઈન્તિયા ગામેથી પસાર થતી વિવિધ એસટી બસો બંધ કરવામાં આવી છે. જેના કારણે મુસાફરોને ખાનગી વાહનમાં મુસાફરી કરવાની ફરજ પડી રહી છે. જેથી ગામના સરપંચ છત્રસંગ ઠાકોરે વિરમગામ એસટી ડેપોના મેનેજરને કોઇન્તિયાના રૂટોની બસ સેવા શરૂ કરવા માટે રજૂઆત કરાઇ છે. જેમાં વિરમગામથી 7:15 કલાકની વિરમગામ-કડી-પનાર બસ જે 9:00 કલાકે કડી થી વિરમગામ આવતી સારી આવક ધરાવતી બસ છે.

સવારે 10 કલાકે ઉપડતી વિરમગામ-પનાર- રામપુરા શટલ બસ, સાંજે 4:00 કલાકે ઉપડતી વિરમગામ- પનાર- દેત્રોજ બસ કોરોના મહામારી ને કારણે 1 વર્ષ જેટલો સમયથી બંધ કરવામાં આવેલી જે વિરમગામ ડેપો મેનેજર દ્વારા આજ દિન સુધી ચાલુ કરવામાં આવી નથી. ઉપર બસો નો રૂટ બંધ હોવાથી અપડાઉન કરતા નોકરિયાત વર્ગ સહિત ધંધાર્થે બહાર જતા લોકોને વધારે ભાડું ચૂકવીને જાનના જોખમે પ્રાઇવેટ સાધનોમાં મુસાફરી કરવી પડે છે જે બાબતે વિરમગામ ડેપો મેનેજર દ્વારા લોકહિતાર્થે સત્વરે કાર્યવાહી થાય તેવી માંગ કોઇન્તિયા ગ્રામ પંચાયત સરપંચ ઠાકોર છત્રસંગ અંબારામજી દ્વારા કરવામાં આવી છે. બસો શરૂ થાય તો મુસાફરોને જીવના જોખમે ખાનગી વાહનોમાં મુસાફરી ન કરવી પડે અને તેઓની મુશ્કેલી દૂર થાય.