નોટિસ:રાષ્ટ્રીય અનુસૂચિત જાતિ આયોગની રાજ્યના મુખ્ય સચિવને નોટિસ

બંધારણના ઘડવૈયા ડો. બાબાસાહેબ આંબેડકરની છબી દરેક સરકારી કચેરીઓમાં પ્રદર્શિત કરવા માટે છેલ્લાં કેટલાંક સમયથી દલિત અધિકાર મંચ દ્વારા લડત ચલાવવામાં આવી રહી છે. તેના ભાગરૂપે દલિત અધિકાર મંચના સંયોજક કિરીટ રાઠોડ દ્વારા રાષ્ટ્રીય અનુસૂચિત જાતિ આયોગમાં ફરિયાદ કરવામાં આવી છે. જેના પગલે આયોગ તરફથી રાજ્યના મુખ્ય સચિવને નોટિસ કાઢીને આ અંગે 30 દિવસમાં અહેવાલ પાઠવવા જણાવ્યું છે.

દલિત અધિકાર મંચના સંયોજકે કરેલી ફરિયાદમાં જણાવ્યું છે કે, ભારતીય બંધારણના ઘડવૈયા ડો. બાબા સાહેબ આંબેડકરના પરિનિર્વાણ દિન નિમિત્તે તેઓને સરકાર દ્રારા રાષ્ટ્રીય નેતાની યાદીમાં સમાવેશ કરવા અને આ અંગે રાજયપાલ સમક્ષ રાજયની તમામ સરકારી અને શૈક્ષણિક કચેરીઓમાં ડો. બાબા સાહેબ આંબેડકરની છબી મૂકવામાં આવે તે માટે લેખિત રજૂઆત કરી હતી. આ રજૂઆતનો પત્ર રાજયપાલની કચેરી દ્વારા સામાન્ય વહીવટ વિભાગને તબદિલ કરવામાં આવ્યો હતો. જેના પગલે સામાન્ય વહીવટ વિભાગ તરફથી અમોને મોકલવામાં આવેલી ઠરાવની નકલમાં ડો. બાબા સાહેબ આંબેડકરનો સમાવેશ થયો નથી. જેના પગલે મુખ્ય સચિવને 30 દિવસમાં અહેવાલ આપવા જણાવવામાં આવ્યું છે.