કોરોના વાઇરસ:કોવિડ હોસ્પિટલમાં તમામ વસ્તુઓની વ્યવસ્થા રાખો: ડો. એચ. કે. ભાવસાર

ગુજરાત રાજયના દરેક જિલ્લાની કોવિડ હોસ્પિટલની ઉચ્ચઅધિકારીઓ દ્વારા  ચેકલિસ્ટ પ્રમાણે તપાસ કરવામાં આવી રહી છે. આથી તેના ભાગરૂપે ગાંધીનગરથી તબીબી સેવાના અધિક નિયામકે મોરબી જિલ્લાની હોસ્પિટલ બાદ સુરેન્દ્રનગર જિલ્લાની ગાંધી હોસ્પિટલમાં આવેલી કોવિડ હોસ્પિટલની તા. 9-5-2020ની શનિવારની રાત્રે 8 કલાકે એકાએક મુલાકાત  લેતા  હોસ્પિટલમાં  દોડધામ મચી હતી. અધિક નિયામક  ડો. એચ.કે.ભાવસારે કોવિડ હોસ્પિટલ, આઇસોલેશન વોર્ડ, આઇસીયુ વગેરે વિભાગોની ચકાસણી કરી દાખલ બે દર્દીની માહિતી મેળવી હતી. અને હોસ્પિટલની વ્યવસ્થા અંગે સંતોષ માની જરૂરી તમામ વસ્તુઓની વ્યવસ્થા રાખવા જણાવ્યુ હતુ.  આ ઉપરાંત જિલ્લા સિવિલ સર્જન એચ.એમ.વેસેટિયન તેમજ  લાયઝન ઓફિસર ડો. દિપ વેસેટિયન સાથે ચર્ચા કરી જરૂરી માર્ગદર્શન આપ્યુ હતુ. અને જિલ્લા આરોગ્ય અધિકારી ડો. બી.કે.વાઘેલા,સિવિલ સર્જન સહિતનાઓએ કલેકટરની મુલાકાત લેવાની સાથે કલેકટરને હોસ્પિટલની સંપૂર્ણ વિગતોથી માહિતગાર કરાયા હતા.