ધરપકડ:સાણંદના ગીબપુર પાસેથી રીઢા 2 ચેઇન સ્નેચર ઝડપાયા, સાણંદ-સરખેજ હાઇવે પરથી 4 ચેઇન તોડી હતી

સાણંદ સરખેજ હાઇવે ઉપર છેલ્લા દોઢ માસથી સોનાની ચેઇનો તોડવાની ઘટનાઓ બનતા સાણંદ પોલીસે વિવિધ દિશાઓમાં તપાસો હાથ ધરી ગીબપુરા પાસેથી 2 અમદાવાદના ઈસમોને ઝડપી લીધા છે.

અમદાવાદ ગ્રામ્ય જિલ્લામાં બનતા મિલકત સંબંધી ગુનાઓ શોધવા તથા બનતા અટકાવવાની સુચના અમદાવાદ વિભાગના પોલીસ મહાનિરીક્ષક વી.ચંન્દ્રશેખર તથા અમદાવાદ ગ્રામ્ય જિલ્લા પોલીસ અધિક્ષક વિરેન્દ્રસિંહ યાદવ તેમજ સાણંદ ડીવીઝનના નાયબ પોલીસ અધિક્ષક કે. ટી. કામરીયાનાએ આપેલ હોય અને સાણંદ પોલીસ સ્ટેશનમાં ચેઈન સ્નેચીંગનો ગુનો નોંધાયેલ હોય જેને લઈને આરોપીઓને ઝડપી લેવા સાણંદ પો.સ્ટે.પોલીસ ઇન્સ્પેક્ટર એચ.બી.ગોહીલ નાઓએ તથા પીએસઆઈ એમ. જે. ઝાલા, જી. કે. ચાવડા, એએસઆઈ મુમતાઝબેન, હે.કો. ગોપાલસિંહ, નાગરાજસિંહ, પો.કો. બહાદુરસિંહ, અનિલભાઇ, અલ્પેશભાઇ,નિરંજનભાઇ, હરપાલસિંહ ટીમે બાતમી આધારે સાણંદ તાલુકાના ગિબપુરા પાસેથી આરોપી ઇમરાનશા યાસીનશા દિવાન (રહેજુહાપુરા, અમદાવાદ) અને સફવાન નિસાર એહમદ શેખ (રહે.નારોલ, અમદાવાદ)ને ઝડપી લીધા હતા. તેમજ આરોપીઓ પાસેથી ગુનામાં વાપરેલ ચોરીના બાઈક તથા લૂંટમાં ગયેલ તમામ સોનાની ચેઈનો, બે મોબાઇલ મળી કુલ કિં.રૂ.2.14.190ના મુદ્દામાલ સાથે ધરપકડ કરી વધુ તપાસની તજવીજ હાથ ધરી છે.

ઝડપાયેલ આરોપી ઇમરાનશા યાસીનશા દિવાનની વિરૂધ્ધમાં વેજલપુર પો.સ્ટે.માં 6 વાહન ચોરીના તથા એક લૂંટનો ગુનો, નવરંગપુરા પો.સ્ટે.માં 2, કારંજ પો.સ્ટે.માં-2 તથા રીવરફ્રન્ટ પો.સ્ટે.માં-1 વાહન ચોરીના એમ કુલ-12 ગુનાઓ નોંધાયેલા છે. જપ્ત કરાયેલા મુદ્દામાલમાં સોનાની ચેઇનો-4 કુલ કિં.રૂ.1.81.190, બજાજ પલ્સર બાઇક કિં.રૂ.25 હજાર, 2 મોબાઇલ કિં.રૂ.8 હજાર મળી કુલ રૂ.2.14.190નો મુદ્દામાલ કબજે લેવાયો હતો.