રજૂઆત:સુવાળા ગામના ફાટક-38 પર અંડરબ્રિજ બનાવવા રજૂઆત

કટોસણ રોડ- બહુચરાજી રેલવે લાઇન પરની સુવાળા ફાટક નંબર 38 પર અંડર બ્રિજ બનાવવા વિસ્તારના ધારાસભ્ય દ્વારા ડિવિઝનલ રેલવે મેનેજરની લેખિત રજૂઆત કરવામાં આવી છે. કટોસણ રોડ બહુચરાજી રેલવે લાઇન ઉપર ગેજ રૂપાંતરનું કામ પ્રગતિમાં છે. કટોસણ રોડ બહુચરાજી રેલવે લાઈન પરની સુવાળા ફાટક નંબર 38 અંડરબ્રિજ બનાવવા સુવાળા ગામના ખેડૂતો સહિત લોકોએ વિરમગામ ધારાસભ્ય લાખાભાઈ ભરવાડને રજૂઆત કરી હતી. ખેડૂતો અને લોકોની રજૂઆતને ધ્યાનમાં લઇ લાખાભાઈ ભરવાડ ધારાસભ્ય દ્વારા ડિવિઝનલ રેલવે મેનેજરની રજૂઆત કરવામાં આવી છે.

અગાઉ પણ તેઓએ એમડી રેલવે વિભાગ ગાંધીનગરને લેખિત રજૂઆત કરી હતી. દેત્રોજ તાલુકાના સુવાળા ગામની સીમમાંથી પસાર થતી કટોસણ રોડ બહુચરાજી તરફની રેલવે લાઈન પર આવેલી ફાટક નંબર 38 છેલ્લા દસ વર્ષથી બંધ કરવામાં આવ્યો છે. જેના કારણે સીમમાં આવેલી 500 વીઘા જમીનના ખેડૂતોને આવવા જવાનો માર્ગ બંધ થયો છે. ખેડૂતોને ખેતર તરફ જવા માટેનો બીજો કોઈ માર્ગ ન હોય ખેડૂતોને પાંચ કિલોમીટર અંતર કાપી ખેતરમાં જવું પડે છે અભ્યાસ અર્થે સુવાળા ગામમાં આવતા વિદ્યાર્થીઓને પણ ભારે હાલાકી ભોગવવી પડે છે. વસવાટ કરતા લોકોને આકસ્મિક સમયે આરોગ્યલક્ષી એમ્બ્યુલન્સ સહિતની સેવા પ્રાપ્ત થઈ શકતી નથી. જેથી રજૂઆત કરાઇ હતી.