ઠંડીનો ચમકારો:5થી 10 કિમીની ઝડપે પવન ફૂંકાતાં ઠંડીનો ચમકારો વધ્યો

દિવસ દરમિયાન ઉત્તર-પૂર્વના ઠંડા પવનો ચાલુ રહેતાં તાપમાનમાં વધારો થયો હોવા છતાં અમદાવાદ સહિત મોટાભાગના શહેરોમાં ઠંડીનું જોર રહ્યું હતું. નલિયામાં સૌથી વધુ 10.1 ડિગ્રી ઠંડી નોંધાઈ હતી. રાજ્યમાં પણ ત્રણથી ચાર દિવસ સુધી ઠંડીનું જોર યથાવત્ રહેવાની વકી છે.

અમદાવાદમાં છેલ્લાં ત્રણ-ચાર દિવસથી ગરમીનો પારો 14 ડિગ્રીની આસપાસ રહેતો હતો. વાતાવરણના ઉપરના લેવલમાં ઠંડા પવનોનું જોર ઘટતાં શહેરના તાપમાનમાં 1 ડિગ્રીનો વધારો થયો હતો. શનિવારે અમદાવાદનું મહત્તમ તાપમાન 31.4 ડિગ્રી અને લઘુતમ તાપમાન 15.2 ડિગ્રી નોંધાયું હતું. જેથી ગરમી વધવી જોઇએ પણ દિવસ દરમિયાન 5થી 10 કિલોમીટરની ગતિના પવનો ચાલુ રહેતાં તાપમાન વધવા છતાં વાતાવરણમાં ઠંડીનો ચમકારો વર્તાયો હતો. ત્રણ દિવસ દરમિયાન અમદાવાદમાં ઠંડીનો પારો 16થી 17 ડિગ્રીની આસપાસ રહેવાની શક્યતા છે.