તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

"વિસ્તરતી ક્ષિતિજ":ધોરણ 10 પછી શું? વિદ્યાર્થીઓને કારકિર્દીનું માર્ગદર્શન આપતી ઈ-બુકનું કોંગ્રેસ દ્વારા વિમોચન કરાયું

અમદાવાદ3 મહિનો પહેલા
  • કૉપી લિંક
પુસ્તકનું વિમોચન કરતા કોંગ્રેસના નેતાઓ - Divya Bhaskar
પુસ્તકનું વિમોચન કરતા કોંગ્રેસના નેતાઓ
  • કોંગ્રેસના પુસ્તક વિમોચનમાં અમિત ચાવડા, પરેશ ધાનાણી, અર્જુન મોઢવાડિયા અને મનીષ દોશી ઉપસ્થિત
  • ઈ-બુક www.incgujarat.com અને www.careerpath.info વેબસાઈટ પરથી ડાઉનલોડ કરી શકાશે.

દર વર્ષની જેમ આ વર્ષે પણ કોંગ્રેસ પક્ષ દ્વારા ધોરણ 10 પછી વિદ્યાર્થીઓએ શું કરવું તે અંગે પ્રેરણા આપતી બુકનું વિમોચન કરવામાં આવ્યું છે. ગુજરાત પ્રદેશ કોંગ્રેસના પ્રમુખ અમિત ચાવડા, વિપક્ષ નેતા પરેશ ધાનાણી, પૂર્વ પ્રમુખ અર્જુન મોઢવાડીયા અને મુખ્ય પ્રવકતા મનીષ દોશી દ્વારા બુકનું વિમોચન કરવામાં આવ્યું હતું. “વિસ્તરતી ક્ષિતિજ” ધોરણ 10 પછી શું? કારકિર્દી માર્ગદર્શન ઈ-બુક ગુજરાત પ્રદેશ કોંગ્રેસ સમિતિની વેબસાઈટ www.incgujarat.com અને www.careerpath.info ઉપરથી પણ ડાઉનલોડ કરી શકાશે.

સ્ટુડન્ટની મુશ્કેલીઓ દૂર કરવા કોંગ્રેસનું પુસ્તક વિમોચન
પુસ્તકના વિમોચન પ્રસંગે ગુજરાત પ્રદેશ કોંગ્રેસ સમિતિના પ્રમુખ અમીત ચાવડાએ જણાવ્યુ હતું કે, વૈશ્વિક મહામારી કોરોનાના કપરા સમયમાં વિદ્યાર્થીઓના શિક્ષણને પડી રહેલી મુશ્કેલીઓથી આપણે સૌ કોઈ ચિંતિત છીએ. ગુજરાતનાં વિદ્યાર્થી-વિદ્યાર્થિની પોતાના ભવિષ્ય માટે આગળ વધી રહ્યા હોય ત્યારે કોરોનાના કપરા સમયમાં પણ યોગ્ય, સચોટ માર્ગદર્શન મળી રહે તે માટે કોંગ્રેસ પક્ષ દ્વારા શિક્ષણ સેવાનાં ભાગરૂપે કારકિર્દી માર્ગદર્શન પુસ્તક “વિસ્તરતી ક્ષિતિજ” વાલી-વિદ્યાર્થીઓ માટે આશીર્વાદરૂપ બની રહ્યું છે. અને કારકિર્દી પસંદ કરવા ઉપયોગી સાબિત થશે. કોરોના મહામારીમાં વિદ્યાર્થી – વાલીઓને રાહત મળે તે માટે સત્ર ફી માફીની કોંગ્રેસ પક્ષ માંગ કરે છે. “વિસ્તરતી ક્ષિતિજ” પુસ્તક તૈયાર કરવામાં ગુજરાત પ્રદેશ કોંગ્રસ સમિતિના મુખ્ય પ્રવક્તા ડૉ. મનિષ દોશી તથા સહયોગીને કોંગ્રેસ પક્ષ તરફથી હાર્દિક અભિનંદન પાઠવ્યા હતાં.

ડૉ. મનીષ દોશી અને તેમના સહયોગીઓ દ્વારા પુસ્તક તૈયાર થયું
કોંગ્રેસ પક્ષના નેતા પરેશ ધાનાણીએ શુભેચ્છા પાઠવતા જણાવ્યું હતું કે, ઉજ્જવળ કારકિર્દી અને સફળ જીવન માટે ધોરણ-10 પછી યોગ્ય અભ્યાસક્રમની પસંદગી મહત્વની બની જાય છે. ગુજરાતનાં તમામ વિદ્યાર્થી મિત્રોને સરળ અને સચોટ માર્ગદર્શન માટે ગુજરાત પ્રદેશ કોંગ્રેસ સમિતિના સંનિષ્ઠ આગેવાન અને મુખ્ય પ્રવક્તા ડૉ. મનીષ દોશી અને તેમના સહયોગીઓ દ્વારા માર્ગદર્શક પુસ્તક “વિસ્તરતી ક્ષિતિજ” પ્રસિદ્ધ કરવાનું ઉમદા કાર્ય કરવામાં આવ્યું છે તે પ્રશંસનીય છે. આવા સુંદર માર્ગદર્શક પુસ્તક પ્રસિદ્ધ કરવા બદલ સહુને અભિનંદન પાઠવું છું. શિક્ષણના વ્યાપારીકરણમાં વ્યસ્ત અને મસ્ત રાજ્ય સરકાર વિદ્યાર્થીઓ પ્રત્યે ગંભીર બેદરકારી દાખવી રહી છે. ભાજપ સરકાર શિક્ષણક્ષેત્રે દિશા વિહીન છે.

'સરકાર શિક્ષણ માટેના નાણાં ઉત્સવો પાછળ વેડફી રહી છે'
કોંગ્રેસ સમિતિના પૂર્વ પ્રમુખ અર્જુનભાઈ મોઢવાડીયાએ જણાવ્યું હતું કે, ઉચ્ચશિક્ષણ મેળવવા માંગતા સામાન્ય-મધ્યમ વર્ગના વિદ્યાર્થીઓ માટે સ્કોલરશીપ,લોનની સુવિધા યુપીએ સરકાર દ્વારા કરવામાં આવી હતી. રાજ્ય સરકારે ગુણવત્તા ધરાવતા વિદ્યાર્થીઓ માટે સ્કોલરશીપની રકમમાં વધારો કરીને પીઠબળ પૂરું પાડવું જાઈએ તેને બદલે સરકાર શિક્ષણ માટેના નાણાં ઉત્સવો પાછળ વેડફી રહી છે, જેથી ગુજરાતના વિદ્યાર્થીઓ સારી શૈક્ષણિક સુવિધાઓ મેળવવાથી વંચિત રહી જાય છે. વિદ્યાર્થીઓને કારકિર્દી સંબંધિત સાચી માહિતી અને યોગ્ય માર્ગદર્શન મળે તે માટે કોંગ્રેસ પક્ષ સદા પ્રયત્નશીલ છે.

પુસ્તકમાં યોગ્ય, સચોટ અને માહિતી સભર માર્ગદર્શન
ડૉ. મનિષ દોશી એ જણાવ્યું હતું કે, ધોરણ-10 પછી અભ્યાસક્રમોની અનેક તકો ઉપલબ્ધ છે. આર્ટ્સ, કોમર્સ અને સાયન્સના વિદ્યાર્થીઓ માટે ભવિષ્યની તકો, સાંપ્રત સમયના નવીન અભ્યાસક્રમો સહિત આગળ વધવા શું કરી શકાય તેવી માહિતી સભર, સચોટ, સરળ માર્ગદર્શક પુસ્તક “વિસ્તરતી ક્ષિતિજ” ઉતમ જીવન નિર્માણનો સાથીદાર બની રહેશે. સમયસર માર્ગદર્શન મળી રહે તેવા વ્યવસ્થા તંત્ર અતિ આવશ્યક છે. કમનસીબે રાજ્ય સરકાર આ પ્રકારની વ્યવસ્થામાં ઊણી ઉતરી છે જે ચિંતાનો વિષય છે. આઈ.ટી.આઈ. સહિત દેશમાં રેગ્યુલર અભ્યાસક્રમ ન કરી શકે તેવા વિદ્યાર્થીઓ માટે એક્સ્ટર્નલ અભ્યાસક્રમ આપતી માન્ય સંસ્થાઓની સાથોસાથ ઈન્દીરા ગાંધી નેશનલ ઓપન યુનિવર્સિટી (ઈગ્નુ) અને ડૉ. બાબા સાહેબ આંબેડકર ઓપન યુનિવર્સિટીની વિગત પણ આપવામાં આવી છે.

અન્ય સમાચારો પણ છે...