બેદરકાર તંત્ર:એકવાર સજાવાયેલું વટવા તળાવ, ઉદઘાટન બાદ ઉકરડો બની ગયું છે

વટવાનું આ એક એવું તળાવ છે જેને ઉદઘાટન વખતે જ શણગારાયું, પછી કોઈ દેખરેખ જ ન થઈ અને આજે ઉકરડા જેવું બન્યું છે. આસપાસના નાગરિકો તળાવ કિનારે અને આસપાસ ગંદકી કરે છે. અહીં તળાવમાં પાણી હોતું જ નથી અને હોય તો ગંદુ પાણી ભરાયેલું જોવા મળે છે. વટવા વિસ્તાર આમ પણ પ્રદુષણને લઈને બદનામ છે તેમાં આસપાસના સહેજેય 1 લાખ જેટલા રહિશોને તળાવ જેવી સુવિધા પણ નામ માત્રની છે કેમ કે તેનું કોઈ મેઈન્ટેનન્સ જ થતું નથી.

સ્થાનિકોની ફરિયાદો છે કે જો આ તળાવને બરાબર ડેવલપ કરાય તો લોકોને કાંકરિયા સુધી જવું ન પડે. આ ઉપરાંત આસપાસના લોકો કચરો ફેંકે છે તેમજ ગંદકી કરે છે. તો કેટલાકે પોતાના સોસાયટીને પાઈપલાઈનને સીધી તળાવમાં આપી દીધી છે. આ બધુ અટકે તો વટવાના લોકોને અહીં આવવાનું પણ ગમે.

વટવાને બદલે કાંકરિયા સુધી લંબાય છે સ્થાનિકો
વટવાના તળાવની સ્થિતી તદ્દન બદતર છે. આ વિસ્તારમાં કોઈને પણ ફરવા જવાનું કહેશો તો તે કાંકરિયાનું જ નામ આપશે કેમ કે વટવાનું તળાવ ફરવાને લાયક જ રહ્યું નથી. અહીં પીવાના પાણીની વ્યવસ્થા ઉભી કરવાની જરૂર છે તો બીજી તરફ વધારે વૃક્ષો ઉછેરવાની પણ જરૂર છે. આમ કરવાથી જ આ તળાવ રળિયામણું બનશે. બાકી હાલ તો આ તળાવ ખંડેર જેવું જ લાગે છે. જો તેનો બરાબર વિકાસ કરાય તો સ્થાનિકો પણ આવે. -મહેન્દ્ર પટેલ,સ્થાનિક

તળાવમાં ગંદકી ભરેલું પાણી જ છે, સફાઇ થતી નથી
વટવાનું તળાવ હાલ શોભાના ગાંઠિયાની જેમ છે. તળાવ છે પણ પાણી નથી. જો પાણી દેખાય તો તે પણ ગંદુ હોય. આસપાસના લોકો ગમે ત્યારે ગંદકી કરે છે. અહીં સ્થાનિક સ્ટાફનો પણ અભાવ છે. નિયમિત સફાઈ કરવી કે પછી ગાર્ડનની દેખરેખ રાખવી તેની તંત્રને કોઈ પરવા જ નથી. અહીંના લોકોને બહાર ફરવા જવું હોય તો રિવરફ્રન્ટ કે કાંકરિયા જ પસંદ કરે છે. બાકી આ ઘર આંગણે રહેલા તળાવને બરાબર રીતે ડેવલપ કરાય તો આ સુંદર સ્થળ બની રહે. -ફેનીલ ચાતોથ, વટવા