ક્રાઈમ:રાણીપમાં તમાકુની નવ હજાર પડીકી સાથે બે લોકો ઝડપાયા

રાણીપ હિમાલયા મોલ પાસેથી પોલીસે વિમલ પાન મસાલા અને તમાકુની 9 - 9 હજાર પડીકી ભરેલા 2 થેલા સાથે 2 આરોપીની ધરપકડ કરી હતી. ઉલ્લેખનીય છે કે લૉકડાઉન જાહેર થયું તે દિવસથી અમદાવાદમાં પાનના ગલ્લાઓ બંધ કરી દેવાયા છે. ત્યારબાદ શહેરમાં આટલી મોટી સંખ્યામાં પાન મસાલા અને ગુટખાનો જથ્થો પહેલી વખત પકડાયો છે. રાણીપ પોલીસે ગુરુવારે રાણીપ હિમાલયા મોલ પાસેથી બે જુદા જુદા વાહન ઉપર પસાર થઇ રહેલા 2 માણસને રોક્યા હતા. તેમની તપાસ કરાતા તેમની પાસે બે કોથળા મળી આવ્યા હતા. પોલીસે તે બંને કોથળા ખોલીને તપાસ કરતા તેમાંથી વિમલ પાન મસાલાના 300 પેકેટ અને તમાકુના 300 પેકેટ મળી આવ્યા હતા. વિમલ પાન મસાલા અને ગુટખાના 1 - 1 પેકેટમાં 30 -30 પકીડી હતી. આમ બંને પાસેના કોથળાઓમાંથી વિમલ પાન મસાલા અને તમાકુની 9- 9 હજાર પડીકી(કિંમત રૂ.45 હજાર ) મળી આવી હતી. તે સાથે રાણીપ પોલીસે ગૌતમ ભૂરાભાઇ ભરવાડ અને તરુણ ઉર્ફે શેટ્ટી ખુશાલભાઇ પરમારને ઝડપી લીધા હતા.