વિવાદ:કોંગ્રેસના સ્થાપનાદિન કાર્યક્રમમાં IT સેલના બે નેતા બાખડી પડ્યા

કોંગ્રેસના સ્થાપના દિવસના ધ્વંજ વંદનનો કાર્યક્રમ યોજાયા પછી એકાએક બે યુવા નેતાઓ વચ્ચે આઇટી સેલમાં નિમણૂકને લઇને બોલાચાલી થઇ હતી. બંન્ને નેતાઓ વચ્ચે શાબ્દિક ટપાટપી એટલી થઇ ગઇ કે એક તબક્કે બંન્ને છૂટ્ટા હાથની મારમારી કરશે તેવી સ્થિતિ હતી. પ્રદેશ પ્રમુખ અમિત ચાવડા સહિતના નેતા હાજર હોવાથી મામલો વણસ્યો નહીં.

અમદાવાદ આઇટી સેલના પ્રમુખ કૃતાર્થ દવે અને જીગર મહારાજ કોંગ્રેસ પ્રદેશ કાર્યાલય ખાતે યોજાયેલા ધ્વંજ વંદન કાર્યક્રમમાં હાજર હતા. આ કાર્યક્રમ પુરો થયા પછી સૌ નેતાઓ ઉભા હતા. પ્રદેશ પ્રમુખ અમિત ચાવડા, ઇન્દ્રવિજયસિંહ ગોહિલ,ભૂમન ભટ્ટ સહિત અનેક નેતાઓ હાજર હતા. આ દરમિયાનમાં કૃતાર્થ દવે અને જીગર મહારાજ એક બીજા સાથે સામાન્ય વાતચીત કરતા હતા. દરમિયાનમાં એકાએક બંન્ને વચ્ચે ઉગ્ર બોલાચાલી થવા પામી હતી.

સૂત્રોના કહ્યા પ્રમાણે અમદાવાદ આઇટી સેલમાં નિમણૂકના મુદ્દે અસંતોષ હોવાથી જીગર મહારાજ અને કૃતાર્થ દવે વચ્ચે જીભાજોડી થઇ હતી. એવું કહેવાય છે કે,આઇટી સેલના પ્રદેશના એક નેતા અને પૂર્વ નેતા એમ બંન્ને નેતાઓના ટેકેદારોને નિમવાના મામલે ગજગ્રાહ હોવાનું બહાર આવ્યું હતું. આ ગજગ્રાહના પરિણામ સ્વરૂપ આ બંન્ને નેતાઓ ઝઘડ્યા હોવાનું કોંગ્રેસના સૂત્રોનું કહેવું છે. આ જીભાજોડી એટલી ઉગ્ર બની ગઇ હતી કે બંન્ને એકબીજા સામે મારામારી કરશે તેવું જણાતા હાજર નેતાઓએ દરમિયાનગીરી કરી હતી. છેવટે મામલો શાંત પડી ગયો હતો.