દુષ્પ્રેરણા:મહિલાએ પૈસા માટે ત્રાસ આપતા સાસરિયાંથી કંટાળીને ફાંસો ખાધો

ન્યૂ વાસણામાં પૈસા લાવવા દબાણ કરતા પતિ, સાસુ, સસરાના ત્રાસથી કંટાળી પરિણીતાએ ગળાફાંસો ખાઈ આપઘાત કર્યો હતો. આ અંગે પોલીસે પતિ, સાસુ અને સસરા વિરુદ્ધ દુષ્પ્રેરણાનો ગુનો નોંધ્યો છે.

ન્યૂ વાસણાના રાજયસ્વ રિવેન્ટામાં રહેતા હર્ષદ કોટક (60) આર્મીના સિવિલ ડિપાર્ટમેન્ટમાંથી નિવૃત્ત થયા છે. તેમની દીકરી ઝંખનાના લગ્ન 2019માં પાલડીના સિગ્મા સ્પર્શમાં રહેતા વરુણ પૂજારા સાથે થયા હતા. ઝંખનાએ લગ્ન બાદ પણ નોકરી ચાલુ જ રાખી હતી. લગ્નના 3 મહિના બાદ જ ઝંખનાને ઘરકામ તેમ જ નાની-નાની બાબતે ત્રાસ આપી મારઝૂડ કરતા હતા. તેનો પૂરો પગાર પણ લઈ લેતા હતા. જ્યારે ઝંખના નોકરી છોડવાની વાત કરતી ત્યારે પતિ, સાસુ, સસરા તેને કહેતા કે તારે નોકરી તો કરવાની જ છે, તું નોકરી કર, બિઝનેસ કર કે વિદેશ જા, અમારે પૈસા જોઈએ.

ઝંખનાને તેના પિતા પાસેથી પૈસા લઈ આવવા પણ દબાણ કરતા હોવાથી તેના પિતાએ ટુકડે ટુકડે રૂ.1.50 લાખ આપ્યા હતા. વારંવારના ઝઘડાથી તંગ આવીને ઝંખના પિયર જતી રહી હતી. દરમિયાન 20 જાન્યુઆરીએ સાંજે ઝંખનાએ પંખા સાથે દુપટ્ટો બાંધી લટકી આપઘાત કર્યો હતો. આ અંગે ઝંખનાના પિતાએ ઝંખનાના પતિ, સાસુ સ્મિતાબેન અને સસરા ચંદ્રકાંતભાઈ વિરુદ્ધ વાસણા પોલીસમાં ફરિયાદ નોંધાવી છે.