કોરોનાની રસી:કોરોનાના દર્દીઓ પર વેક્સિનનો ઉપયોગ અઠવાડિયામાં શરૂ થશે, આજે મળનારી બેઠકમાં અંતિમ નિર્ણય લેવાશે

શહેરની સોલા સિવિલ હોસ્પિટલમાં વોલન્ટિયર્સ પર ભારત બાયોટેક નિર્મિત કોવેક્સિનનું ટ્રાયલ ચાલી રહ્યું છે, જેમાં અત્યાર સુધી 170થી વધુને વેક્સિન અપાઈ ચૂકી છે અને આ ટ્રાયલ હજુ 10 મહિના ચાલશે ત્યારે બીજી તરફ ફાયઝર ઈન્ડિયા કંપનીએ તો ડ્રગ્સ કન્ટ્રોલર જનરલ ઓફ ઇન્ડિયા પાસે 4 ડિસેમ્બરે કોરોના વેક્સિનનો દર્દીઓ પર ઉપયોગ કરવા મંજૂરી માગી છે.

મંગળવાર ગાંધીનગર ખાતે વીડિયો કોન્ફરન્સ મારફતે દિલ્હીમાં આરોગ્ય મંત્રાયલ સાથે ઉચ્ચસ્તરીય બેઠક યોજાશે, જેમાં રાજ્યમાં કોવિડ-19 વેક્સિનના દર્દી પરના ઉપયોગ અને સોલા સિવિલમાં ચાલી રહેલી ટ્રાયલને આગળ વધારવી કે નહીં તે અંગે નિર્ણય લેવાશે. સૂત્રોએ જણાવ્યું કે, મંગળવારે સવારે મળનારી બેઠકમાં વેક્સિનનો દર્દી પરના ઉપયોગ કરવા અંગેનો અંતિમ નિર્ણય કરાશે. એક વખત નિર્ણય થાય પછી એક સપ્તાહમાં તેનો ઉપયોગ શરૂ કરાશે. કોરોના વેક્સિનનો દર્દીઓ પરનો ઉપયોગ ગુજરાતમાં શરૂ કરાશે તે બાબતે આરોગ્ય સચિવ જયંતી રવિને પૂછતાં તેમણે જણાવ્યું કે, મંગળવારે સવારે દિલ્હી આરોગ્ય મંત્રાલય સાથેની વીડિયો કોન્ફરન્સમાં સૂચના મળશે તે મુજબ રાજ્ય સરકાર કામ કરશે.