નીતિન પટેલનું નિવેદન:રેસિડન્ટ ડોક્ટરોની હડતાળ તદ્દન ગેરવ્યાજબી, ચર્ચા કરવા રાજ્ય સરકારનુ મન ખુલ્લું છે પણ ગેરવ્યાજબી માગણી સ્વીકારીશું નહીં

અમદાવાદ2 મહિનો પહેલા
આરોગ્ય મંત્રી નીતિન પટેલ
  • આ વિદ્યાર્થીઓ સરકારી મેડીકલ કોલેજેમાં પ્રજાનાં જ નાણાં થકી બિલકુલ નજીવી ફી થી અભ્યાસ મેળવે છે: નીતિન પટેલ

હાલ રાજ્યભરમાં ચાલી રહેલી રેસિડન્ટ ડોક્ટરોની હડતાલ અંગે આરોગ્ય મંત્રી નીતિન પટેલે હડતાલને ગેરવ્યાજબી ગણાવતા કહ્યું કે, રાજ્યની સરકારી મેડીકલ કોલેજ સંલગ્ન શૈક્ષણિક હોસ્પિટલોનાં રેસિડેન્ટ ડૉકટર્સની ચાલી રહેલ હડતાળ તદ્દન ગેરવાજબી છે. કોઇપણ યોગ્ય કારણો વગર હડતાળ કરીને દર્દીઓને હાલાકી પહોંચાડવાનો પ્રયાસ કરવામાં આવ્યો છે એને સરકાર ચલાવી લેશે નહીં. તમામ તબીબો દર્દીઓની સેવા કરવી તે પોતાની નૈતિક ફરજ સમજીને બિનશરતી હડતાળ પાછી ખેંચીને માનવસેવાના ઉમદા કામમાં લાગી જવા તબીબોને તેમણે અનુરોધ કર્યો છે.

ડીગ્રી મેળવી તબીબ બની ગયા હોવાથી વિદ્યાર્થી રહેતા નથી
નીતિન પટેલે આગળ કહ્યું કે, રેસિડેન્ટ તબીબોની માગણીઓ વ્યાજબી હશે, તો તે માટે તેમની સાથે ચર્ચા કરવા રાજ્ય સરકારનુ મન ખુલ્લુ છે પણ ગેરવ્યાજબી માગણીઓ ને રાજ્ય સરકાર કયારેય સ્વીકારશે નહીં કેમ કે, કોઈપણ સમસ્યા હોય એનુ સમાધાન ચર્ચાથી આવે હડતાળ એ કોઈ ઉપાય નથી. ખોટી રીતે હડતાળ પાડીને માનવીય સેવાઓથી દૂર રહેવું એ યોગ્ય નથી.

પહેલા ફરજ પર હાજર થઈ સેવામા જોડાઈ જાઓ ત્યારબાદ સરકાર રેસિડેન્ટો સાથે ચર્ચા કરશે. આ તબીબો હવે વિદ્યાર્થી રહેતા નથી કેમ કે, તેઓએ યુનિવર્સિટીની ડીગ્રી મેળવી તબીબ બની ગયા છે એટલે એમણે હોસ્ટેલ સત્વરે ખાલી કરીને એમને જે સી.એચ.સી અને જિલ્લા-તાલુકા કક્ષાની હોસ્પિટલોમાં સેવા માટેના ઉંચા પગાર સાથે ઓર્ડર કર્યા છે એમાં સત્વરે જોડાઈ જવુ જોઈએ.

રાજ્ય સરકારની બોન્ડ નીતિ સ્પષ્ટ છે
નાયબ મુખ્યમંત્રીએ ઉમેર્યું કે, રાજ્ય સરકારની બોન્ડ નીતિ સ્પષ્ટ છે, જેમાં સ્નાતક તેમજ અનુસ્નાતક વિદ્યાર્થીઓને પ્રવેશ સમયે આપેલ બોન્ડની શરતો મુજબ એક વર્ષ/ત્રણ વર્ષની ગ્રામ્ય વિસ્તારમાં સેવાઓ આપવાની થાય છે. આ વિદ્યાર્થીઓ સરકારી મેડીકલ કોલેજ ખાતે પ્રજાનાં જ નાણાં થકી બિલકુલ નજીવી ફી થી અભ્યાસ મેળવે છે. ત્યારબાદ આ અભ્યાસક્રમ પૂર્ણ થયેથી રાજ્યના છેવાડાનાં નાગરિકોને આરોગ્ય વિષયક સેવાઓ આપવી તેઓની ફરજ છે એટલે બોન્ડનો જે વિરોધ કરે છે એ વ્યાજબી અને કાયદેસર નથી.

રાજ્ય સરકાર દ્વારા અશિસ્ત બદલ પગલા લેવાશે
વધુમાં તેમણે જણાવ્યું કે, હાલમાં પી.જી.ના પ્રથમ, બીજા અને ત્રીજા વર્ષમાં અભ્યાસ કરતા રેસિડેન્ટ ડોક્ટરો હડતાળમાં જોડાયા છે. બધા હડતાળમાં જોડાયેલ ડોક્ટરોના હિતમાં છે કે તેઓએ ગેરકાયદે હડતાળ પાછી ખેંચી લેવી જોઇએ. અન્યથા રાજ્ય સરકાર દ્વારા તેમની સામે અશિસ્ત બદલ પગલા લેવામાં આવશે. ગુજરાતની 4 કરોડ જેટલી જનતા તાલુકા મથકો તથા ગામડામાં વસતી હોય, આ તાલુકા મથકો તથા ગામડાઓમાં રહેતા દર્દીઓની સારવાર સારી રીતે થાય તે જોવાની રાજ્ય સરકારની ફરજ છે, તેથી દર્દીઓના હિતમાં ડોક્ટરોએ કરેલ ગેરકાયદેસર હડતાલ પાછી ખેંચી લે અને જેમને જ્યાં ફરજ આપી છે ત્યાં તેઓ ફરજ પર જોડાઇ દર્દીઓની સેવામાં પુન:લાગી જાય તેવી અપીલ કરેલ છે.

નિયત થયેલી બોન્ડની રકમ જમા કરાવી બોન્ડ મુક્ત થઈ શકે છે
તેમણે ઉમેર્યું કે, રાજ્ય સરકાર દ્વારા તમામ બોન્ડેડ તબીબોને કોવિડ સમયેની ફરજ અન્વયે વધારાના લાભો આપવામાં આવ્યાં હતાં. રાજ્યના ગ્રામ્ય વિસ્તારોમાં બોન્ડ મુજબ સેવા આપવા માટે 1 ઓગસ્ટ 2021થી ગ્રામ્ય વિસ્તારમાં રાજ્ય સરકારે બોન્ડેડ તબીબ તરીકે સેવા આપવા માટે આદેશો કરવામાં આવ્યા છે. જે બોન્ડેડ પીજી તબીબને બોન્ડ મુક્ત થવું હોય તો જે મેડીકલ કોલેજમાં તેમણે અભ્યાસ કર્યો હોય ત્યાં નિયત થયેલ બોન્ડની રકમ જમા કરાવી બોન્ડ મુક્ત થઇ શકે છે.

સરકાર ઈચ્છે એ તબીબો સહિત અન્ય સેવાના લોકોની સેવાઓ લઈ શકે
નીતિન પટેલે અંતે કહ્યું કે, વર્ષોથી એપેડેમિક એક્ટ અમલમાં છે અને આ કાયદામાં જ જોગવાઈ છે સરકાર ઈચ્છે એ તબીબો સહિત અન્ય સેવાના લોકોની સેવાઓ લઈ શકે છે. કોરોનાના કારણે રાજ્ય સરકારે ખાસ કિસ્સામા સેવાઓ માટે છૂટછાટો આપી હતી. રાજ્ય સરકારનુ લક્ષ્ય છે કે, નાગરિકોને ઉમદા પ્રકારની આરોગ્યલક્ષી સેવા આપીને સારવાર પુરી પાડવી એટલે અમે વિધાનસભામા ખાનગી હોસ્પિટલો માટે હોસ્પિટલ એસ્ટાબ્લીસમેન્ટ એકટ પણ પસાર કર્યો છે જેમા ખાનગી હોસ્પિટલો કેવી હોવી જોઈએ એમાં મળતી સેવાઓ કેવા પ્રકારની હોવી જોઈએ એવી અનેક જોગવાઈઓ આપણે કરી છે જેના પરિણામે આગામી સમયમાં દર્દીઓને શ્રેષ્ઠ અને સસ્તી સારવાર મળશે.

તેમણે કહ્યુ કે,તબીબી સેવા એ સમાજની એક ઉમદા સેવા છે. આ હડતાળ ગેરકાયદેસર તથા કોઇપણ પ્રકારના કારણો સિવાયની છે. ત્યારે આ તબીબો પોતાની નૈતિક ફરજ સમજીને ગુજરાતની પ્રજાને આરોગ્ય વિષયક સેવાઓ આપી તેમના સરકારે નિયત કરેલા ફરજના સ્થળે તાત્કાલિક હાજર થઇ જાય.