મ્યુઝિયમ વીક:શોર્ટ વીડિયો જણાવશે શહેરના 30 મ્યુઝિયમનો વારસો

ઈતિહાસમાં બનેલી ઘટનાઓ અને તેની સાક્ષી પુરતી વસ્તુઓને ભાવી પેઢી સુધી પહોંચાડવાનું કામ સંગ્રહાલયો કરે છે. અમદાવાદીઓ માટે ગર્વ લેવા જેવી બાબત છે કે અમદાવાદમાં 30 જેટલા મ્યુઝિયમ્સ આવેલા છે. 11મીથી 17મી દરમિયાન અમદાવાદના આ સંગ્રહાલયો વિશે લોકો જાણે તે માટે મ્યુઝિયમ્સ અમદાવાદ દ્વારા ‘મ્યુઝિયમ્સ વીક’ની ઉજવણી કરાશે. આ સાથે અમદાવાદના જાણીતા મ્યુઝિયમ્સ વિશેના શોર્ટ વીડિયો, મ્યુઝિયમ્સ અંગેના જાણકારના ઓનલાઈન સેશન લઈને સંગ્રહાલયો વિશેની માહિતી શેર કરશે.
બે વર્ષમાં ત્રણ નવા સંગ્રહાલયો અમદાવાદમાં બન્યા છે
હેરિટેજ પ્રોફેશનલ અવનિ વારિયાએ મ્યુઝિયમ્સ વિશે કરેલા પોતાના સંશોધન વિશે જણાવતા કહ્યું કે, ‘મારા સંશોધન અને દસ્તાવેજીકરણ મુજબ અમદાવાદમાં 30થી વધુ સંગ્રહાલયો અને ખાનગી સંગ્રહો છે, દર વર્ષે સંખ્યા ઉમેરો થાય છે. મારી માહિતી મુજબ છેલ્લા 2 વર્ષમાં અમદાવાદમા 3 નવા સંગ્રહાલયો ઉમેરાયા છે. અમે અમદાવાદના સંગ્રહાલયોનો નકશો ડિઝાઇન અને પ્રકાશિત કર્યો છે, જેનુ પદ્મશ્રી કાર્તિકેય સારાભાઈ દ્વારા લોકાર્પણ થયું છે.
જેઠાભાઈ શેઠની હવેલીમાં સચવાયેલું છે 200 વર્ષ જૂનું બેલેન્સિંગ ટોય
જેઠાભાઇ શેઠની હવેલીમાં હેરીટેજ ટોય્સનું અનોખું મ્યુઝિયમ બન્યું છે. 300 વર્ષ જૂના આ મ્યુઝિયમમાં લાકડાં, માટી, સ્ટીલ, ચાંદી, પિત્તળ, કાગળ, વાંસ, માર્બલનાં ૩૦૦ જેટલા રમકડાંનો અનોખો સંગ્રહ છે. બ્રિટીશ શાસન વખતના રમકડાં હોય કે મરાઠા કાળનાં રમકડાં હોય આ મ્યુઝિયમ તમામ રમકડાંની ઝાંખી કરાવે છે. બ્રિટિશ શાસન વખતની 150 વર્ષ જુની ટીનની દેશી બગી, રોલ્સ રોય્સ ગાડી, ધરીવાળો ગુલાંટ મારતો વાંદરો, 200 વર્ષ જુની ચાંદીમાંથી બનેલી ઘોડાગાડી અને અન્ય મોંઘા રમકડાં, ઘરગથ્થા રમવાનો પિત્તળનો સેટ, જેમાં પાણીનો બંબો, ટિફિન, કીટલી, ચૂલો, ઓરસીયો, સાણસી સહિતના વાસણોનો સમાવેશ થાય છે. આ સાથે ચિંચુડાના સિદ્ધાંત પર કામ કરતું મરાઠા કાળનું ૨૦૦ વર્ષ જુનું બેલેન્સિંગ ટોય મ્યુઝિયમના ખાસ આકર્ષણો પૈકી એક છે.
અમદાવાદની ઓળખ બન્યાં છે 30 મ્યુઝિયમ્સ