આશ્ચર્ય:સરકારના રેલવે વિભાગે જ સરકાર સમક્ષ માગ કરી ‘રેલવેની જમીન બુલેટ ટ્રેન માટે જોઇએ તો બજાર ભાવ આપો’

બુલેટ ટ્રેન માટે ખેડૂતો અને જમીનધારકો બજાર ભાવ માગે એ સ્વાભાવિક છે પણ કેન્દ્ર સરકારના જ રેલવે વિભાગે બજાર ભાવ માગતા જમીન સંપાદન અધિકારીઓ પણ આશ્ચર્યમાં મુકાઈ ગયા હતા. અમદાવાદ રેલવે ડિવિઝનની આશરે 108 જેટલી જમીન બુલેટ ટ્રેન માટે સંપાદિત થાય છે. આ જમીનનું વળતર બુલેટ ટ્રેન ઓથોરિટી દ્વારા નક્કી કરાયેલા ભાવને બદલે બજાર ભાવ પ્રમાણે વળતર આપવાની માગણી રેલવેના બે અધિકારીઓએ કલેક્ટર કચેરી સમક્ષ કરી હતી.

બે અધિકારી ડે. કલેક્ટર બી.કે. પટેલને મળ્યા અને કહ્યું હતું કે, બુલેટ ટ્રેન માટે રેલવેની જમીન જોઈએ તો બજાર ભાવ પ્રમાણે વળતર આપવા અમારી માગ છે. જોકે મામલો રેસિડન્ટ કલેક્ટર એસ.બી. વોરા સમક્ષ જતા તેમણે સત્તાવાર રજૂઆત કરવા રેલવે અધિકારીઓને કહ્યું હતું.