ચૂંટણી:અમદાવાદ જિલ્લા પંચાયતના ભાજપના ઉમેદવારોની પસંદગીમાં ધારાસભ્યોની યાદીને મહત્ત્વ અપાયું

અમદાવાદ જિલ્લા પંચાયતના ભાજપના ઉમેદવારોની યાદી જાહેરાત થઇ ગઇ છે. ઉમેદવારોની પસંદગીમાં ધારાસભ્યોની યાદીને મહત્વ અપાયુ હોવાનું મનાય છે. કોંગ્રેસના એક પણ પક્ષ પલ્ટુને ટિકિટ નહીં અપાતા ભારે નારાજગી બળવાખોરોમાં પણ નારાજગી જોવા મળી રહી છે. ચાર ઉમેદવારો રિપિટ થયા છે તો એક ટર્મ અગાઉના બે ઉમેદવારોને પણ ફરી ટિકી આપવામાં આવી છે.

જિલ્લા ભાજપની જાહેર કરેલી યાદીમાં રિપીટ કરાયેલા ચાર ઉમેદવારોમાં ગત ચૂંટણી લડનાર સૂરજિતસિંહ ગોહિલના સ્થાને તેમના પત્નિ અલ્પાબા સૂરજિતસિંહ ગોહીલને હડાળા બેઠક તેમજ અન્નપૂર્ણા દિગપાલસિંહ ચુડાસમાના પતિ દિગપાલસિંહ જયુભા ચુડાસમાને ધોલેરા બેઠક ફાળવવામાં આવી છે. આ સિવાય રેખા કાંતિ લકુમ અને અજમલ ઉદેસંગ બારડને પણ રિપીટ કરાયા છે. પ્રદેશ પ્રમુખ સી.આર.પાટીલે એક પણ પક્ષપલ્ટુને ટિકીટ નહીં આપતા કોંગ્રેસમાંથી ભાજપની વંડી ઠેકીને ગયેલા ઉમેદવારોમાં ભારે નારાજગી જોવા મળી હતી. એક પક્ષપલ્ટુને બળવો કરતા સમય આગામી ચૂંટણીમાં ટિકીટ આપવાની એક ધારાસભ્યે આપેલી બાંયેધરી પણ ખોટી પડી છે. જેથી પક્ષપલ્ટુ ઉમેદવારોમાંથી કેટલાક બળવો કરી ફરી કોંગ્રેસમાં જાય તેવી સ્થિતી સર્જાઇ છે.

કોંગ્રેસમાં બળવાખોર સભ્યોને કોઇ સ્વિકારવા તૈયાર નહીં હોવાથી બે ઉમેદવાર હવે અપક્ષ ચૂંટણી લડે તેવી પણ શક્યતા છે. અગાઉ વર્ષ 2010થી 2015માં ચૂંટણી જીતનાર રમણ ભાણા સોલંકીને કોઠ અને દિવાનજી સુરસંગજી ઠાકરોને દેત્રોજમાંથી ટિકીટ મળી છે. રાજકીય આગેવાનોના જણાવ્યા અનુસાર જિલ્લા-તાલુકા પંચાયતો અને નગરપાલિકાની ચુંટણીના ઉમેદવારોની પસંદગી માટે વિરમગામ, સાણંદ, માંડલ, દેત્રોજમાં વિરમગામના ભાજપના આગેવાનો, સાણંદ અને બાવળામાં સાસંદની ટીમ, ધંધુકા, ધોળકા, ધોલેરામાં ધારાસભ્યોએ અને દસક્રોઇના ઉમેદવારો માટે પણ બે ધારાસભ્યોએ ઉમેદવારોની પસંદગી કરી છે. આ વખતે બેઠકોની કેટેગરીમાં ફેરફાર થવાથી 34માંથી મોટાભાગના ઉમેદવારો રિપીટ નહીં થવાની શક્યતા હતી. ટિકીટ નહીં મળવાના લીધે જિલ્લા પંચાયતના સિટીંગ સભ્યોએ પણ નારાજગી વ્યક્ત કરી ટિકીટ પસંદગીમાં વ્હાલાદવલાની નિતી રાખવામાં આવી હોવાનો રોષ વ્યક્ત કર્યો હતો. ઉમેદવારો સામે ભારે નારાજગી વ્યક્ત કરી કાર્યકરોએ બળવો કરવાની ચીમકી ઉચ્ચારી છે.

આગામી બે દીવસમાં રાજકીય ઉથલપાથળની શક્યતા
અમદાવાદ જિલ્લા પંચાયતમાં કોંગ્રેસના પક્ષપલ્ટુઓએ ચાલુ ટર્મમાં બળવો કરી વંડી ઠેકી ભાજપમાં જોડાઇ ગયા હતાં. ભાજપમાં જોડાયા ત્યારે માત્ર મનુજી ઠાકોરે એક પણ રૂપિયો લીધો નહતો. આ સિવાય તમામ સભ્યોએ નક્કી કરેલી રકમ લીધી હતી. રકમ નહીં મળવાના લીધે સત્તાના એક વર્ષ પછી પ્રમુખ સામે બાંયો ચઢાવી હતી. આ સમય જિલ્લા આગેવાનોના કહેવાથી પ્રમુખે બળવાખોર સભ્યોને સાચવી લીધા હતાં. બળવાખોર સભ્યોએ કોંગ્રેસમાં પરત જવા માટે અત્યારથી સંપર્કો શરૂ કરી દીધા છે. આગામી બે દિવસમાં રાજકીય ઉથલપાથળની શક્યતા છે.

ગેરરીતિના આક્ષેપ છતાં બે ઉમેદવારો રીપીટ: કાર્યકરો નારાજ
સામાજિક ન્યાય સમિતીના સભ્ય રેખા કાંતિભાઇ લકુમ અને બાંધકામ સમિતીના ચેરમેન અન્નપૂર્ણા દિગપાલસિંહ ચુડાસમાના પતિ દિગપાલસિંહ ચુડાસમાને આ વખતની ચૂંટણીમાં રિપિટી કરાયા છે. રેખા લકુમને કાવીઠા બેઠક અને દિગપાલસિંહ જયુભા ચુડાસમાને ધોલેરા બેઠક પરથી ટિકીટ અપાઇ છે. પાર્ટીના આગેવાનોમાં કોઇ વિચારધારા રહી નથી. ગેરરિતીના આક્ષેપ છતાં કાર્યકરોને સાંભળ્યા વગર સારી છબી ધરાવનાર ઉમેદવારોને ટિકીટ આપી નથી. અલ્પાબા સૂરજિતસિંહ ગોહીને રિપીટ નહીં કરી બદલવા માટે ઉચ્ચકક્ષાએ રજૂઆત કરાઇ છે. આ ત્રણેય ઉમેદવારોને બદલવામાં નહીં આવે તો ભાજપને નુકશાન થશે.

અમદાવાદ જિલ્લા પંચાયતના ભાજપના ઉમેદવારો