વાચકોની મરજી:‘ભાસ્કર’ની મહિલા ગેસ્ટ એડિટરની પહેલ, 21મીએ પ્રથમ અંકમાં ડૉ. સ્વરૂપ સંપટ રાવલ ગેસ્ટ એડિટર હશે

કોરોનાકાળ બાદ દિવ્ય ભાસ્કર વાચકોના સૂચન પર દર રવિવારે એક મહિલાને ગેસ્ટ એડિટર બનાવી મહિલાઓનું અને વાચકોની મરજીનું સન્માન કરવા જઈ રહ્યું છે. જેના ભાગરૂપે 21 ફેબ્રુઆરીએ અમારા પ્રથમ મહિલા ગેસ્ટ એડિટર પૂર્વ મિસ ઈન્ડિયા, જાણીતાં અભિનેત્રી અને ટીચર્સ ટ્રેનિંગ ક્ષેત્રે ગુજરાતમાં પ્રશંસનીય કામગીરી કરનારાં ડૉ. સ્વરૂપ સંપટ રાવલ હશે. સોમવારે દિવ્ય ભાસ્કર ખાતે યોજાયેલી એક પત્રકાર પરિષદમાં આ ઈનિશિયેટિવની જાહેરાત કરાઈ. આ મહિલા ગેસ્ટ એડિટર સમાચારોની પસંદગી અને એનું પાના પર વેઈટેજ નક્કી કરશે. એક મહિલા તરીકે એમને ઘરેલુ હિંસાથી માંડીને બાળકોના ઉછેર સુધીના જે કોઈ મુદ્દા ઉઠાવવા લાયક લાગે એ વિષયક સમાચારોને પ્રાધાન્ય અપાશે અને એ મુજબ વિશેષ સ્ટોરીઝ પણ કરાવવામાં આવશે.

અખબારની આ પહેલમાં પ્રોજેક્ટ કો-ઓર્ડિનેટરની મહત્ત્વની ભૂમિકા ભજવી રહેલાં જાણીતા લેખક અને દિવ્ય ભાસ્કરનાં કોલમિસ્ટ કાજલ ઓઝા વૈદ્યે કહ્યું કે, ‘અમારા શરૂઆતના ગેસ્ટ એડિટર્સના લિસ્ટમાં ડૉ. સ્વરૂપ સંપટ રાવલ ઉપરાંત ટીના અંબાણી, દીપિકા ચિખલિયા, મોનલ ગજ્જર અને ગીતા રબારી જેવાં નામો છે. મહિલા ગેસ્ટ એડિટર્સના સિલેક્શનનો એક માત્ર ક્રાયેટેરિયા વાચકોનાં સૂચનો છે. અમે વાચકો પાસેથી મંતવ્યો માગીશું કે તમે કઈ મહિલાને ગેસ્ટ એડિટર પદે જોવા ઈચ્છો છો અને શા માટે? અમારા માટે મહત્ત્વનું એ છે કે એ એક મહિલા છે, એ સેલિબ્રિટી છે કે નહીં એ મહત્ત્વનું નથી. અમે આગળ જતાં વકીલ, ડોક્ટર, પેઈન્ટર અને રાઈટર્સ જેવા અલગ અલગ ક્ષેત્રોમાંથી પણ મહિલા એડિટરની પસંદગી કરીશું.’