આગાહી:આગામી બે દિવસમાં રાજ્યમાં ઠંડીમાં ઘટાડો શરૂ થશે, આગામી 24 કલાક સુધી લઘુતમ તાપમાનમાં કોઈ ફેરફાર થશે નહીંઃ હવામાન વિભાગ

ઉત્તરપૂર્વથી પૂર્વ દિશાના પવનને પગલે ગુજરાતના અનેક સ્થળે ઠંડીમાં વધારો નોંધાયો છે. જેમાં નલિયા 7 ડિગ્રી સાથે ઠંડુંગાર રહ્યું હતું. જ્યારે ગાંધીનગરમાં 8.5 ડિગ્રી તાપમાનથી કડકડતી ઠંડી અનુભવાઇ હતી.ત્યારે આગામી બે દિવસમાં લઘુતમ તાપમાનમાં વધારો થતાં રાજ્યમાં ઠંડીમાં ઘટાડો શરુ થશે.

આગામી 24 કલાક દરમિયાન લઘુતમ તાપમાનમાં ફેરફાર થવાની સંભાવના નથી
હવામાન વિભાગના મતે રાજ્યમાં આગામી 24 કલાક દરમિયાન લઘુતમ તાપમાનમાં ફેરફાર થવાની સંભાવના નથી. પરંતુ ત્યારબાદના ચાર દિવસ દરમિયાન લઘુતમ તાપમાનમાં વધારો થતાં ઠંડીમાં ઘટાડો અનુભવાશે. અમદાવાદમાં 13.8 ડિગ્રી સાથે સરેરાશ લઘુતમ તાપમાનમાં સામાન્ય કરતાં 0.6 ડિગ્રીનો વધારો જ્યારે 28.9 ડિગ્રી સાથે સરેરાશ મહત્તમ તાપમાનમાં સામાન્ય.કરતાં 1 ડિગ્રીનો ઘટાડો નોંધાયો હતો. આગામી 3 દિવસ અમદાવાદમાં 14 ડિગ્રીની આસપાસ તાપમાન રહેશે જ્યારે 13 ફેબુ્રઆરી સુધીમાં લઘુતમ તાપમાન 13 ડિગ્રીએ જઇ શકે છે.

રાજ્યભરમાં આગામી મંગળવારથી ઠંડીમાં ઘટાડો અનુભવાશે
રાજ્યભરમાં આગામી મંગળવારથી ઠંડીમાં ઘટાડો અનુભવાશે. ગત રાત્રિએ રાજ્યમાંથી અન્યત્ર કેશોદમાં 9.9, પોરબંદરમાં 10.8, વલસાડમાં 11, ડીસામાં 11.1, ભાવનગરમાં 12.6, અમરેલીમાં 12.7, ભૂજમાં 13.2, રાજકોટમાં 13.9, વડોદરામાં 14, સુરેન્દ્રનગરમાં 14.8, દીવમાં 15 જ્યારે સુરતમાં 19 ડિગ્રી સરેરાશ લઘુતમ તાપમાન નોંધાયું હતું.

માઉન્ટ આબુમાં છેલ્લા પાંચ દિવસમાં તાપમાનમાં વધઘટ નોંધાઈ
માઉન્ટ આબુમાં છેલ્લા પાંચ દિવસમાં તાપમાનમાં વધઘટ નોંધાઈ રહી છે. માઈનસ ચાર ડિગ્રીથી તાપમાનનો પારો ઊંચકાઈને 4.4 ડિગ્રી નોંધાયો હતો. તેમાં છેલ્લા બે દિવસ દરમિયાન તાપમાન બે ડિગ્રી બાદ આજે ફરીથી ઝીરો ડિગ્રી સાથે ઠંડીમાં વધારો નોંધાયો છે. જોકે ઠંડીનું જોર વધવાની સાથે આજે સહેલાણીઓનો પણ ધસારો વધ્યો હતો.