• Gujarati News
  • Local
  • Gujarat
  • Ahmedabad
  • The Children Were Soaked By The Rain From The Leaves Of The Anganwadi Of Kharaghoda; The Supervisor Said, "Even If The Children Get Wet, Attendance Is A Must."

સ્માર્ટ શિક્ષણની વાતો વચ્ચે આ છે રિયાલિટી:ખારાઘોડાની આંગણવાડીના પતરાંમાંથી વરસાદ વરસતાં બાળકો ભીંજાયા; સુપરવાઈઝરે કહ્યું-બાળકો ભલે ભીંજાય, હાજરી તો જોઈશે જ

3 મહિનો પહેલાલેખક: યશપાલ બક્ષી
  • આંગણવાડીનાં સંચાલિકાએ કહ્યું-વરસાદ અંદર પડે તો બાળકો રડતાં હોય છે, અનેક ફરિયાદો કરી, કોઈ સાંભળતું નથી

સુરેન્દ્રનગર જિલ્લાના દસાડા તાલુકાનો ખારાઘોડા વિસ્તાર. આ રણ વિસ્તાર ત્રણ ભાગમાં વહેંચાયેલો વિસ્તાર છે. જૂનાગામ ખારાઘોડા, નવાગામ ખારાઘોડા અને સ્ટેશન ખારાઘોડા. આ બધું મળીને 14 હજારની વસતિ છે અને કુલ 14 આંગણવાડી છે. આ 14માંથી પાંચેક આંગણવાડી તો દાયકાથી જર્જરિત અવસ્થામાં છે. આ વાત છે નવાગામ ખારાઘોડાના 12 નંબરના આંગણવાડી કેન્દ્રની. ભારે વરસાદ પડે ત્યારે છાપરામાંથી પાણી વરસે છે. પાણી અંદર વરસે ત્યારે બાળકો રડવા લાગે છે અને તેમને ઘરે પણ નથી મોકલી શકાતા, કારણ કે આંગણવાડી વર્કર બહેનને સુપરવાઈઝરનો આદેશ છે કે બાળકો ભલે ભીંજાય, હાજરી તો જોઈશે જ... આંગણવાડીમાં સાવ નાનાં ભૂલકાંથી લઈ છ વર્ષ સુધીનાં 35થી 38 બાળકો આવે છે. હવે તો વાલીઓ પણ કહે છે કે જો આ જ સ્થિતિ રહી તો અમે અમારા બાળકોને આંગણવાડીમાં નહીં મોકલીએ...

આંગણવાડીનાં તૂટેલાં છાપરાં
આંગણવાડીનાં તૂટેલાં છાપરાં

જે ખાંચો કોરો હોય ત્યાં ચૂલો રાખીને મૂઠિયાં બનાવ્યાં
ખારાઘોડાની આંગણવાડીના કેન્દ્ર નંબર 12ના વર્કર ખતીજાબેન સબાસરાએ દિવ્ય ભાસ્કર સાથેની વાતચીતમાં કહ્યું કે, હું પાટડીથી રોજ અપડાઉન કરું છું. અમારા આંગણવાડી કેન્દ્ર માટે અનેકવાર CDPO (Child Development Project Officer)ને રજૂઆતો કરી છે પણ મને કાયમ એક જ જવાબ મળે છે કે, રિપેરિંગ માટે ગ્રાન્ટ નથી. માત્ર વરસાદની સમસ્યા નથી. અનેક સમસ્યા છે. પાઈપ સડી ગયા છે, કેટલાક તૂટી ગયા છે. પંખો મેં બે-ત્રણવાર રિપેર કરાવ્યો પણ વરસાદ આવે ત્યારે પાણી અંદર જાય એટલે બંધ પડી ગયો છે. વરસાદમાં રસોઈ કરવી મુશ્કેલ છે. આજની ગુરૂવારની જ વાત કરું તો સવારથી ખૂબ વરસાદ હતો. આંગણવાડીમાં પાણી અંદર વરસતું હતું. રસોઈ થઈ શકે તેમ નહોતી છતાં બાળકોને તો ભૂખ્યા રખાતા નથી એટલે મેં ફળની વ્યવસ્થા કરી અને ચૂલો નીચે ઉતારી જ્યાં કોરી જગ્યા હતી ત્યાં રાખીને બાળકોને મૂઠિયાં બનાવી દીધાં. આંગણવાડીમાં 35 જેટલા બાળકો આવે છે અને તમામ બાળકો અગરિયાના બાળકો છે. આ સમસ્યા અમારા માટે આજકાલની નથી. અમે તો દસ-બાર વર્ષથી આ જ સ્થિતિમાં છીએ.

આંગણવાડીની બહારથી લેવાયેલી તસવીર.
આંગણવાડીની બહારથી લેવાયેલી તસવીર.

પાટડી ઘટક-1માં અરજી નથી સ્વીકારાતી
આંગણવાડી વર્કર ખતીજાબેન કહે છે, અમારી ઓફિસ પાટડી ઘટક-1 છે. કાંઈ પણ હોય તો ત્યાં અરજી આપવાની. હું અનેકવાર અરજી આપવા જાઉં છું કે છાપરાં સરખાં કરાવો, પાઈપ રિપેર કરાવો, પંખા રિપેર કરાવો... પણ મારી અરજી સ્વીકારવામાં આવતી નથી. અરજીની ઝેરોક્ષમાં સહી કરીને પાછી નથી આપતા. માત્ર વર્ષોથી એક લાઈનનો જ જવાબ મળે છે, 'થઈ જશે'. પણ ક્યારેય કશું થતું નથી.
સ્માર્ટ શિક્ષણની વાતો વચ્ચે છુપાયેલી સમસ્યા
ગુજરાત સરકાર અને દિલ્હી સરકાર વચ્ચે એજ્યુકેશન વોર ચાલી રહી છે. એકબીજાના રાજ્યોમાં જઈને શાળાની મુલાકાતો લેવાય છે અને મોટા બણગાં ફૂંકાય છે પણ અંતરિયાળ વિસ્તારમાં હકીકત જુદી છે. આ માત્ર ખારાઘોડાની સમસ્યા નથી. ગુજરાતના અંતરિયાળ ગામડાંઓમાં આંગણવાડીની આ જ સમસ્યા છે.

આંગણવાડીના હચમચી ગયેલા પાયા
આંગણવાડીના હચમચી ગયેલા પાયા

આ સવાલ સામે આવી રહ્યા છે
જો દસ વર્ષથી આંગણવાડીની આ હાલત છે તો દસ વર્ષમાં આવેલી ગ્રાન્ટ ક્યાં ગઈ ? સુપરવાઈઝર કહે છે કે રિપેરિંગ માટે ગ્રાન્ટ નથી તો ગાંધીનગરથી શા માટે ગ્રાન્ટ પહોંચતી નથી ? માનો કે ગ્રાન્ટ પહોંચે છે તો ક્યાં વપરાય જાય છે ? બાળકો ભલે ભીંજાય, હાજરી તો જોઈશે જ... એવો આદેશ આપીને બાળકોને હેરાનગતિ કરાય છે તો પગલાં શા માટે લેવાતા નથી ? જ્યારે આંગણવાડી વર્કર સમસ્યા લઈને ઓફિસમાં જાય છે તો લેખિત અરજી સ્વીકારવાની ના કેમ પાડવામાં આવે છે ? શું આ સવાલોના જવાબ ગુજરાત સરકાર આપી શકશે ?

(તસવીર : અંબુ પટેલ, ખારાઘોડા)

અન્ય સમાચારો પણ છે...