વિરોધ:મા કાર્ડની સેવા ફરી ચાલુ કરાવવા માટે SVPના ડૉક્ટરોની હડતાળ; ડીવાયએમસીની કાર ઘેરી લઈ વિરોધ, અંતે હડતાળ સમેટાઈ

એસવીપીમાં મા કાર્ડની સેવા ચાલુ ન કરાતા રેસિડન્ટ ડૉક્ટરોએ શુક્રવારે બપોરે અચાનક હડતાળ પાડી હતી. ડૉક્ટરોની ફરિયાદ હતી કે મા કાર્ડ સેવા બંધ હોવાથી દર્દી ઓપરેશન માટે આવતા નથી અને તેને લીધે તેમને પ્રેક્ટિકલ શીખવા મળતું નથી.

એસવીપીમાં થોડા સમય અગાઉ કોવિડ સિવાયની સારવાર શરૂ કરાઈ છે. જોકે મા કાર્ડની સેવા ચાલુ ન હોવાથી દર્દીએ ઓપરેશન જેવા કેસમાં પૈસા ચૂકવવા પડે છે માટે દર્દીઓ પૂરતી સંખ્યામાં આવતા નથી. બીજી તરફ ખાનગી હોસ્પિટલોમાં મા કાર્ડની સેવા ચાલુ છે. ડૉક્ટરોએ એસવીપીની મુલાકાતે આવેલા ડીવાયએમસીની કાર પણ અટકાવી હતી અને ડીવાયએમસીએ હોસ્પિટલમાં બેસી રહેવું પડ્યું હતું. એ પછી વિદ્યાર્થીઓના એક ગ્રૂપની રજૂઆત સાંભળવામાં આવી હતી. આખરે ચર્ચાબાદ હડતાળ સમેટી લેવામાં આવી હતી.