કાર્યવાહી:શાહપુરમાં પથ્થરમારાની ઘટનામાં પોલીસ સામે પગલાં લેવા સુપ્રીમ કોર્ટના ચીફ જસ્ટિસને રજૂઆત

ગુજરાત મુસ્લિમ હિત રક્ષક સમિતિએ સુપ્રીમ કોર્ટના ચીફ જસ્ટિસને પત્ર લખી લોકડાઉનમાં ગુજરાતમાં ખાસ કરીને અમદાવાદના શાહપુરમાં લઘુમતી કોમના લોકો પર પોલીસ દ્વારા અત્યાચાર ગુજારવામાં આવ્યો હોવાની રજૂઆત કરી જવાબદાર લોકો સામે પગલાં લેવાની માગણી કરી છે. પત્રમાં જણાવ્યાનુસાર, લોકડાઉનમાં શ્રમિક વર્ગના દલિત તેમ જ લઘુમતી કોમના લોકો પર કારણ વગર ત્રાસ ગુજારવામાં આવી રહ્યો છે. ખાસ કરીને તાજેતરમાં શાહપુરમાં બનેલી ઘટનામાં પોલીસે લોકોને નિર્દયતાથી મારી ખોટા કેસ કરી જેલમાં ધકેલી દીધા છે. શાહપુરની મૂળ ઘટનામાં દૂધ વેચી રહેલી એક વૃદ્ધ મહિલા સાથે પોલીસે અસભ્ય વર્તન કરી તેને માર મારતા સ્થાનિક લોકો આ મહિલાની મદદ માટે આવ્યા હતા, જેને લઈ પોલીસ સાથે બોલાચાલી થઈ હતી. ત્યાર બાદ ઘર્ષણ થતાં મામલો બિચક્યો હતો.