રાહત:સેન્ટ ઝેવિયર્સ કોલેજે ફી 15% ઘટાડી, બે હપ્તે ભરી શકાશે

સેન્ટઝેવિયર્સ કોલેજે કોરોના માહામારીને કારણે ચાલુ વર્ષની ફીમાં 15 ટકાનો ઘટાડો કર્યો છે. જો વિદ્યાર્થી એક સાથે તમામ ફી ભરવા સમર્થ ન હોય તો વિદ્યાર્થી બે ઇન્સ્ટોલમેન્ટમાં ફી ભરી શકશે. જેમાં 19 ડિસેમ્બર પહેલા પહેલો ઇન્સ્ટોલમેન્ટ અને 20 જાન્યુઆરી સુધીમાં બીજો ઇન્સ્ટોલમેન્ટ ભરવાનું રહેશે. તેમ છતા જો કોઇ વિદ્યાર્થી ફી ભરવા સક્ષમ ન હોય તો મેઇલ કરી શકશે.

કોરોના મહામારીને કારણે સ્કૂલોમાં 25 ટકા ફી માફીની સરકાર દ્વારા જાહેરાત કરાઇ છે. પરંતુ કોલેજોમાં અભ્યાસ કરતા બાળકોના વાલીને ફી માફી અંગે સરકારે કોઇ જ જાહેરાત કરી નથી. વાલીઓની માંગ છતાં પણ સરકાર દ્વારા કોલેજોની ફી માફી અંગે કોઇ નિર્ણય લીધો નથી. ટેકનિકલ કોલેજોની ફી માફી માટે પણ સરકારે કમિટી બનાવી છે, પરંતુ ડિસેમ્બર સુધી કમિટી દ્વારા ફી માફી અંગે કોઇ જ નિર્ણય હજુ સુધી લીધો નથી. આ સ્થિતિમાં સેન્ટ ઝેવિયર્સ કોલેજનો 15 ટકા ફી ઘટાડાનો નિર્ણય અન્ય કોલેજોને પ્રેરણા આપી શકે છે.