કોરોના વોરિયર:શી ટીમ વૃદ્ધ મહિલાને રોજ ICUમાં દાખલ પતિને મળવા લઈ જાય છે

વસ્ત્રાપુર પોલીસની શી ટીમ અઠવાડિયાથી સિનિયર સિટીઝન મહિલાને આઈસીયુમાં દાખલ તેમના પતિ માટે ઘરેથી હોસ્પિટલ અને હોસ્પિટલથી ઘરે લઈ જાય છે. 
જજિસ બંગલા વિસ્તારના શ્યામ કૃપા એપાર્ટમેન્ટમાં અનસૂયા દેસાઈ સૌરાષ્ટ્ર યુનિ.ના નિવૃત્ત કુલપતિ અને તેમના પતિ પતિ જયેશ દેસાઈ (89) સાથે રહે છે. જયેશભાઈને 4 મેએ આઈસીયુમાં દાખલ કરાયા હતા, પરંતુ તેમની દીકરી અમેરિકા હોવાથી અને તેમના દીકરાનો ફ્લેટ ક્લસ્ટર ક્વોરન્ટાઈન હોવાથી બંને હોસ્પિટલ આવી શકે તેમ નથી.
આ અંગે અનસૂયાબેને વસ્ત્રાપુર પોલીસ સ્ટેશનમાં જઈને કહ્યું કે, મારા પતિ આઈસીયુમાં દાખલ છે, તેમની દવા લેવા ઘરે જવું છે, જો તમે રિક્ષા મગાવી આપો તો આપનો આભાર. એટલે શી ટીમ તેમને ઘરે લઈ ગઈ. ત્યારબાદ ઘરેથી દવા લીધી અને પાછાં હોસ્પિટલ લાવ્યાં. પતિની સારવાર ચાલુ થતાં અનસૂયાબેને શી ટીમનો આભાર માન્યો હતો.  શી ટીમે કહ્યું, ગમે ત્યારે અમને ફોન કરજો તો અમે આવી જઈશું.
પરપ્રાંતીયોને ફોર્મ ભરવામાં 50 ‘શી’ ટીમ મદદ કરશે
શહેર પોલીસ કમિશનર આશિષ ભાટિયાએ જણાવ્યું હતું કે, પરપ્રાંતીયોને વતનમાં મોકલવા ફોર્મ ભરવા તેમ જ ડિજિટલ એપ્લિકેશન કરવાની કામગીરીમાં મદદરૂપ થવા માટે પોલીસની 50 શી ટીમને કામે લગાડાશે. આ ટીમ ટ્રેન સહિતની તમામ માહિતી પૂરી પાડશે.