વેક્સિન ક્યારે મળશે?:'નોકરી પર કહે છે વેક્સિન લઈને આવો, અહીં મળતી નથી', અમદાવાદના પૂર્વ વિસ્તારમાં વેક્સિન ન મળતા લોકોનો હોબાળો

અમદાવાદ4 મહિનો પહેલા
વસ્ત્રાલમાં અર્બન હેલ્થ સેન્ટર બહાર લોકોની ભીડ
  • વસ્ત્રાલ, અમરાઈવાડી અને ખોખરા અર્બન હેલ્થ સેન્ટર બહાર લોકોનો હોબાળો
  • મર્યાદિક સંખ્યામાં ટોકનથી વેક્સિન અપાતી હોવાથી લોકોને ધક્કા
  • સવારે 6 વાગ્યાથી લાઈનમાં ઊભા રહેનારા લોકો વીલા મોઢે પાછા જાય છે

શહેરમાં ગત 21 જૂને મ્યુનિ.એ સત્તાવાર જાહેરાત કરી હતી કે હવે અમદાવાદમાં રોજ 1 લાખ નાગરિકોને વેક્સિન અપાશે. જોકે તંત્ર 9 દિવસે પણ રોજના આ આંકડાના અડધા લોકો સુધી વેક્સિન આપી શક્યું નથી. છેલ્લા 4 દિવસથી નાગરિકો વેક્સિનેશન માટે એક સેન્ટરથી બીજા સેન્ટરે ફાંફાં મારી રહ્યા છે, જે દર્શાવે છે કે શહેરમાં રોજના એક લાખના વેક્સિનેશનનો મામલો પણ જુમલો જ સાબિત થયો છે. 4 દિવસના વેક્સિનેશનનો સરવાળો કરીએ તો પણ માંડ 71939 જેટલો થાય છે. બીજી તરફ અમદાવાદમાં અર્બન હેલ્થ સેન્ટરમાં રસી લેવા આવતા લોકોએ આજે રસી ન મળતા હોબાળો મચાવ્યો હતો.

વેક્સિન માટે હોબાળો
શહેરના પૂર્વ વિસ્તારમાં આવેલા વસ્ત્રાલ, અમરાઈવાડી તથા ખોખરા અર્બન હેલ્થ સેન્ટરોમાં મર્યાદિત સંખ્યામાં ટોકનો ફાળવીને જ વેક્સિન આપવામાં આવી રહી છે. એવામાં સવારે 6 વાગ્યાથી રસી લેવા માટે લાઈનમાં ઊભા રહેનારા લોકોએ વેક્સિન ન મળતા હોબાળો મચાવ્યો હતો. વેક્સિન લેવા માટે નાગરિકો સવારે 6 વાગ્યાથી લાઈનમાં ઊભા રહેતા હોય છે. જેમાં સીનિયર સીટિઝનો પણ સામેલ છે. છતાં વેક્સિન ન મળતા ફરજના પરના સંચાલકો સાથે લોકોની ઉગ્ર બોલાચાલી થતી હોય છે જેના કારણે પોલીસનો કાફલો વસ્ત્રાલ અર્બન હેલ્થ સેન્ટર ખાતે બોલાવવો પડ્યો હતો.

દરિયાપુરમાં ગઈકાલે વેક્સિન ન મળતા લોકોએ હોબાળો મચાવ્યો હતો
દરિયાપુરમાં ગઈકાલે વેક્સિન ન મળતા લોકોએ હોબાળો મચાવ્યો હતો

સીનિયર સિટિઝનોને વેક્સિન લેવામાં હાલાકી
બીજી બાજુ વેક્સિનને લઈને પડી રહેલી હાલાકીને પગલે સીનિયર સિટીઝનોએ સ્થાનિક કોરપોરેટરેને આ અંગેની જાણ કરીને રજુઆતો કરી હતી. જોકે તેમને માત્ર ખોખલા આશ્વાસનો આપીને પ્રજા સેવકોએ હાથ અધ્ધર કરીને તંત્ર પર દોષનો ટોપલો ઢોળી દીધો. શહેરમાં એક બાજુ વેક્સિનની અછત વર્તાઈ રહી છે, બીજી બાજુ સરકાર દ્વારા વધુમાં વધુ લોકોને વેક્સિન લેવા માટે કહી રહી છે.

ત્રીજા ભાગનું પણ વેક્સિનેશન થયું નથી
છેલ્લા 4 દિવસથી નાગરિકો વેક્સિનેશન માટે ફાંફાં મારે છે, ત્યારે મ્યુનિ.નો રોજના એક લાખને વેક્સિનેશનનો દાવો યાદ આવે છે. છેલ્લા 9 દિવસમાં માંડ 2.88 લાખ નાગરિકોને જ વેક્સિન અપાઇ છે, એટલે કે લક્ષ્યાંકના ત્રીજા ભાગનું પણ વેક્સિનેશન થઇ શક્યું નથી. મ્યુનિ.એ 175 વેક્સિનેશન સેન્ટરો પર વેક્સિન આપવાની કામગીરી શરૂ કરી હતી, જોકે આજે એ પૈકીનાં માંડ 70 સેન્ટરો પર જ વેક્સિન આપી શકાઇ છે. 30 જૂન સુધી શાકભાજી, દુકાનદાર, ફેરિયાઓ, પાથરણાંવાળા સહિતના વ્યવસાયીઓનું ફરજિયાત વેક્સિનેશન કે એક સપ્તાહ પહેલાં કરેલો આરટી-પીસીઆર રિપોર્ટ સાથે રાખવાનો આદેશ મ્યુનિ.એ કર્યો હતો. જોકે અત્યારસુધીમાં 12170 સુપર સ્પ્રેડર્સને વેક્સિન અપાઈ છે.