વ્હિલચેર સુલભ કાર સેવા શરૂ:દિવ્યાંગો માટે રેમ્પ વાળી કાર સેવા શરૂ કરાઈ, કોઈની મદદ વિના વ્હિલચેર સાથે જ કારમાં બેસીને ફરી શકશે

અમદાવાદએક મહિનો પહેલાલેખક: મિતેશ બ્રહ્મભટ્ટ
  • કૉપી લિંક
  • અમદાવાદથી શરૂ થયેલી આ સેવા હવે રાજ્યભરમાં 50 કાર સાથે શરૂ કરાશે

દિવ્યાંગ વ્યકિતઓ વ્હિલચેર સાથે જ કારમાં હરી-ફરી શકે તે માટે અખિલ હિન્દુસ્તાની દિવ્યાંગ સંગઠન દ્વારા 3 દિવસ પહેલાં વ્હિલચેર સુલભ કાર સેવા શરૂ કરાઈ છે. ગુજરાતમાં પહેલી વખત શરૂ કરાયેલી આ કારની ખાસિયત એ છે કે તેમાં રેમ્પ બનાવાયા છે, જેથી દિવ્યાંગ ‌વ્યક્તિ વ્હિલચેર સાથે જ રેમ્પની મદદથી સીધા કારમાં બેસી શકશે.

આ અંગે અખિલ હિન્દુસ્તાની દિવ્યાંગ સંગઠનના પ્રમુખ સમીર કક્કડે જણાવ્યું હતું કે, અત્યાર સુધી દિવ્યાંગો માટે વ્હિલચેર સિવાય કોઇપણ વાહન તૈયાર કરવામાં આવ્યા નથી. એમ્બ્યુલન્સમાં પણ દિવ્યાંગને ઊચકીને જ સારવાર માટે હોસ્પિટલમાં લઈ જવા પડે છે. ગુજરાતમાં પ્રથમ વખત દિવ્યાંગો માટે રેમ્પ વાળી કાર સેવા શરૂ કરાઈ છે.

અમદાવાદમાં 1 કારથી શરૂ કરાયેલ આ સેવા હવે રાજ્યભરમાં 50 કાર સાથે શરૂ કરાશે. આ સેવાથી દિવ્યાંગ વ્યક્તિ વ્હિલચેર પર બેસીને રેમ્પની મદદથી કારમાં બેસી શકશે. આ સેવાનો લાભ લેનાર વ્યક્તિએ 2 કલાકના રૂ. 400 ચૂકવવા પડશે. આ રૂ. 400 ડ્રાયવરના પગાર અને પેટ્રોલના ખર્ચાને ધ્યાનમાં રાખીને નક્કી કરવામાં આવ્યા છે.

કાર ઓકિસજન બોટલ અને GPSથી સજ્જ
આ કારમાં દિવ્યાંગ વ્યક્તિ મુસાફરી કરનાર હોવાથી તેમની સગવડને ધ્યાનમાં રાખીને કારમાં ઓકિસજન સિલિન્ડર રા‌ખવામાં આવ્યું છે. તેમ જ કારને જીપીએસથી સજ્જ કરવામાં આવી છે. ઉપરાંત પેસેન્જર માટે પેકિંગમાં સૂકો નાસ્તો, પાણીની બોટલ, મોબાઈલ ચાર્જર, વ્હિલચેર, ફેસ માસ્ક, સેનેટાઈઝર સહિતની તમામ સગવડો પણ રાખવામાં આવી છે.

અન્ય સમાચારો પણ છે...