તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

જટિલ સર્જરી:બે દિવસની કોરોના સંક્રમિત બાળકી પર "ટ્રેકિઓ-ઇસોફૅગલ ફિસ્યુલા"ની સફળ સર્જરી કરી સિવિલના તબીબોએ નવજીવન આપ્યું

અમદાવાદ4 મહિનો પહેલા
  • કૉપી લિંક
સિવિલના તબીબો સાથે બાળકીની તસ� - Divya Bhaskar
સિવિલના તબીબો સાથે બાળકીની તસ�
  • નવજાત બાળકીની અન્નનળી શ્વાસનળી સાથે જોડાયેલી હોઈ ખોરાક નહોતી લઈ શકતી.
  • આ જન્મજાત સમસ્યા દર 5000 બાળકોએ એકમાં જોવા મળતી હોય છે.
  • એક દિવસ પહેલા જ બાળકી કોરોનાગ્રસ્ત હોવાની જાણ થઈ છતાં તબીબોએ જટિલ ઓપરેશન પાર પાડ્યું.

કહેવાય છે કે કાળા માથાનો માનવી જો ધારી લે તો કશું જ અસંભવ નથી હોતું. અસંભવને સંભવ બનાવતી અને તબીબોની હિંમત માટે દાદ માગી લે તેવી એક ઘટના અમદાવાદ સિવિલમાં બની છે. જેમાં ડોક્ટર્સની ટીમે માત્ર બે દિવસની કોવિડ-19 પોઝિટિવ બાળકી ઉપર ટ્રેકિઓ-ઇસોફૅગલ ફિસ્ટુલાની સફળ સર્જરી કરીને બાળકીને નવજીવન જ બક્ષ્યું, સાથે જ આ કપરા કાળમાં એક શ્રમિક પરિવારમાં આનંદની કિલકારીઓ પણ ગૂંજતી કરી છે.

જેતપુરની એક સ્થાનિક હોસ્પિટલમાં 15 એપ્રિલ જગતભાઈ અને હેતલબા ઝાલાની પુત્રીનો જન્મ થયો હતો. જગતભાઈ પેઇન્ટ ઇન્ડસ્ટ્રીમાં શ્રમિક તરીકે કામ કરીને આજીવિકા મેળવે છે. બાળકીના જન્મ બાદ દંપતિ શેર માટીની ખોટ પુરાવાથી ખુશખુશાલ હતું. પણ એવામાં પરિસ્થિતિએ ગંભીર વળાંક લીધો. બાળકીના જન્મ બાદ જાણવા મળ્યું કે તે ખોરાક લઇ શકતી નહોતી અને તેને ફીણ સાથે ઉલટી થતી હતી. ટેસ્ટ બાદ બાળકીને ટ્રેકિઓ-ઇસોફૅગલ ફિસ્ટુલા નામની સમસ્યા હોવાનું જાણવા મળ્યું.

જન્મજાત સમસ્યાથી પીડાતી બાળકીનું સિવિલમાં સફળ ઓપરેશન
સિવિલ હોસ્પિટલ બાળરોગ સર્જરી વિભાગના વડા ડૉ. રાકેશ જોષી જણાવે છે કે, "આ બાળવિકાસને લગતી એવી જન્મજાત સમસ્યા છે કે જેમાં અન્નનળીનો ઉપરનો ભાગ બ્લોક હોય બાકીનો અડધો ભાગ શ્વાસનળી સાથે જોડાયેલો રહે. જે કારણોસર બાળકને ભોજન લેવું અશક્ય બની રહે. બાળકીના જન્મના બીજા જ દિવસે જ તબીબોએ સ્થિતિની ગંભીરતા જોઇને બાળકીને અમદાવાદ સિવિલ હોસ્પિટલમાં સર્જિકલ મેનેજમેન્ટ માટે રિફર કરી હતી. અમદાવાદ સિવિલમાં વધુ એક ગંભીર સમસ્યા આ ગરીબ પરિવારની જાણે પ્રતીક્ષા કરી રહી હતી. સિવિલમાં જે દિવસે સવારે ઓપરેશન થવાનું હતું તેના એક દિવસ પહેલા જ બાળકી કોવિડ-19 માટે RT-PCR પોઝિટિવ હોવાનું જાણવા મળ્યું. શ્વસનની તકલીફના લીધે બાળકીને હાઇ ફ્લો ઓક્સિજન પર શિફ્ટ કરાઈ.

ઓપરેશન પહેલા જ બાળકી કોરોના સંક્રમિત હોવાનું માલુમ પડ્યું
ઓપરેશન પહેલા જ બાળકી કોરોના સંક્રમિત હોવાનું માલુમ પડ્યું

બાળકીનું ઓપરેશન કેમ અતિ જટિલ હતું?

  • બાળકીની ખુબ જ નાની વય- નાના બાળકોના કિસ્સામાં વય જેટલી ઓછી હોય, સર્જરી એટલી જ જટિલ હોય છે.
  • શ્રમિક પરિવારની આ બાળકીને ટ્રેકિઓ-ઇસોફૅગલ ફિસ્ટુલાની દર 5000 બાળકે જોવા મળતી સમસ્યા હતી.
  • ઓપરેશન બાદ શ્વાસનળી ઉપર સતત લાળના સ્ત્રાવનું તથા ફેફસાં પર ઇન્ફેક્શનનું જોખમ હતું સાથે કોરોનાનું સંક્રમણ પણ હતું.

સર્જરી બાદ બાળકીને 1200 બેડની હોસ્પિટલ શિફ્ટ કરાઈ
તબીબો સહિત આખી ટીમ ઉપર કોવિડ-19ની મહામારીનું જોખમ હોવા છતાં તબીબોએ નવજાત બાળકીનો જીવ બચાવવા 18 એપ્રિલે અતિ જટિલ કહી શકાય તેવી સર્જરી કરી. નાના બાળકોના કિસ્સામાં વય જેટલી ઓછી હોય, સર્જરી એટલી જ જટિલ હોય છે. પીડિયાટ્રિક સર્જરીના એસોસિએટ પ્રોફેસર ડૉ. જયશ્રી રામજી અને તેમની ટીમ દ્વારા આ ઓપરેશન સફળતાપૂર્વક કરવામાં આવ્યું. ઓપરેશનમાં એનેસ્થેસિયા વિભાગના આસિ. પ્રોફેસર ડૉ. સીમા ગાંધીના વડપણ હેઠળ એનિસ્થીઝ ટીમ ખડે પગે હતી. સર્જરી બાદ બાળકીને 1200 બેડની કોવિડ હોસ્પિટલમાં ખસેડાઇ, જ્યાં વધુ 3 દિવસ તેને વેન્ટિલેટર પર રાખવામાં આવી. અહીં ડૉ. ગાર્ગી પાઠક, ડૉ. આરિફ વોહરા અને ડૉ. અંકિત ચૌહાણની પિડિયાટ્રિશિઅન્સની ટીમે બાળકીની સંભાળ લીધી.

ટ્રેકિઓ-ઇસોફૅગલ ફિસ્ટુલાની સમસ્યા દર 5000 બાળકે એકમાં જોવા મળે છે
ટ્રેકિઓ-ઇસોફૅગલ ફિસ્ટુલાની સમસ્યા દર 5000 બાળકે એકમાં જોવા મળે છે

ઓપરેશન બાદ બાળકીને ચમચીથી ખોરાક આપી શકાયો
​​​​
ધીરે ધીરે ડૉક્ટર્સની જહેમત રંગ લાવવા લાગી. પહેલા બાળકીને એરવો મશીન પર શિફ્ટ કરાઈ અને પછી હળવેથી ઓક્સિજન સપોર્ટ પણ હટાવી લેવાયો. એપરેશનના બીજા જ દિવસથી ટ્યુબ ફિડિંગ પણ શરૂ થઈ ગયું હતું. ઓપરેશનના બારમાં દિવસે ડાઇ સ્ટડી કરાયો, જેમાં કોઇ લિકેજ ન હોવાનુ સાબિત થયું. પછી બાળકીને ચમચી દ્વારા ખોરાક આપવાનું શરૂ કરાયું અને બાદમાં તમામ ટ્યૂબ્સ હટાવી લેવાઇ. હવે બાળકી તેના ઘરે જઇને આનંદનો કિલકિલાટ કરવા સજ્જ બની છે.

દર 5000 દીઠ એક બાળકમાં જોવા મળે છે આવી સમસ્યા
આ બાળકીના કિસ્સા અંગે સિવિલ હોસ્પિટલના અધિક મેડિકલ સુપ્રિન્ટેન્ડન્ટ અને પિડિયાટ્રિક સર્જરી વિભાગના વડા ડૉ. રાકેશ જોષીએ કહ્યું કે “ટ્રેકિઓ-એસોફૅગિઅલ ફિસ્ટુલા એ દર 5000 દીઠ એક બાળકમાં જોવા મળતી જન્મજાત સમસ્યા છે. તેની સાથે અન્ય તકલીફો જોડાયેલી પણ હોઇ શકે છે. આ સર્જરીના પરિણામનો આધાર અન્નમાર્ગના બંને છેડા વચ્ચેના અંતર ઉપર તેમજ ફેફસાની પરિસ્થિતિ ઉપર આધારિત હોય છે. આમાં બાળક લાળ ગળી શકતું નથી તેથી શ્વાસનળી ઉપર સતત લાળના સ્ત્રાવનું જોખમ હોય છે. અધૂરામાં પૂરું અન્નમાર્ગ અને શ્વાસનળી વચ્ચેનું ઍબનોર્મલ કમ્યૂનિકેશન ફેફસાં પર ઇન્ફેક્શનનું જોખમ પણ સર્જે છે. આ બિમારીના કિસ્સામાં, તેમજ આ બિમારી હૃદયની તકલીફ સાથે જોડાયેલી હોય તેવા કિસ્સામાં મૃત્યુ અને મોર્બિડિટી, બંનેનું પ્રમાણ ઊંચું હોય છે. આ વખતે તો કોવિડ-19 એ આવી ગંભીર સર્જરીને વધુ પડકારજનક બનાવી દીધી હતી.” આ બાળકીને હવે સર્જરી કે કોરોના સાથે જોડાયેલી કોઇ તકલીફ નથી. બાળકીને વેન્ટિલેટરની જરૂર પડે તેવી તકલીફ પણ નથી.