ડિજીટલ ઇન્ડિયા:ટ્રેનના ખુદાબક્ષો પાસેથી હવે દંડ પણ કેશલેસમાં જ વસૂલ કરાશે, ટિકિટ ચેકિંગ સ્ટાફને 200 POS મશીન અપાયાં

ડિજીટલ ઇન્ડિયાના ભાગરૂપે પશ્ચિમ રેલ્વેના અમદાવાદ ડિવિઝન દ્વારા ટીકિટ ચેકિંગ સ્ટાફને 200 પીઓએસ (પોઇન્ટ ઓફ સેલ) મશીન અપાયા છે. જેનાથી હવે મુસાફરોને ટ્રેન અને પ્લેટફોર્મ પર રોકડ વ્યવહારથી મુક્તિ મળશે. મુસાફરો ક્રેડિટ- ડેબિટ કાર્ડ ઉપરાંત ક્યુઆર કોડ સ્કેન કરીને આસાનાથી પેમેન્ટ કરી શકશે. પહેલા તબક્કામાં અમદાવાદ ડિવિઝનના ટિકિટ ચેકિંગ સ્ટાફને 200 પીઓએસ મશીન આપ્યા છે.

પીઓએસ મશીનથી હવે ટ્રેનમાં ટિકિટ વગર પકડાયેલા લોકોની સાથે ઓછી ટીકીટ લેનારા લોકો પાસેથી ઓનલાઇન પેમેન્ટ દ્વારા દંડ વસૂલી શકાશે. ઉપરાંત પ્લેટફોર્મ પર પણ લોકોની સુવિધા માટે હવે પીઓએસ મશીન સાથે ટીકિટ ચેકિંગ સ્ટાફ જોવા મળશે. મંડલ વાણિજ્ય પ્રબંધક રવિન્દ્ર શ્રીવાસ્તવે જણાવ્યું હતું કે, મંડલના ડિજિટલ પગલાથી મુસાફરો ટ્રેનોમાં અને પ્લેટફોર્મ પર રોકડ વ્યવહારથી મુક્તિ મેળવશે. મુસાફરો રોકડની સાથે આ ડિજિટલ સુવિધાનો લાભ લઈ શકશે.