વેબિનાર:GCCIની વિમેન વિંગના વેબિનારમાં એક્સપર્ટ્સે કહ્યું ‘પેટન્ટ ડિઝાઇન હંમેશા ઓરિજિનલ અને નવીનતા વાળી હોવી જોઇએ’

GCCIની બિઝનેસ વિમેન વિંગ કમિટી અને IPR એન્ડ લીગલ કમિટી દ્વારા બેઝિક ટ્રેડમાર્ક કોપી રાઇટ્સ, પેટન્ટ ડિઝાઇનની માહિતી આપતા એક ખાસ વેબિનારનું આયોજન કરવામાં આવ્યું હતું. બિઝનેસ વિમેન વિંગ કમિટીના ચેરપર્સન શિલ્પા ભટ્ટ અને કો-ચેરપર્સન કુસુમકૌર વ્યાસે તમામ મહિલા સદસ્યોને વેબિનાર અંગે ઉંડાણપૂર્વક માહિતી આપી વક્તાઓનો પરિચય કરાવ્યો હતો. ઉપરાંત દરેક સદસ્યોને આ વેબિનાર તેમના બિઝનેસમાં તે કેવી રીતે સહાયરૂપ થઇ શકશે તે અંગે જાણકારી આપી હતી.

વક્તા એડવોકેટ ડૉ. રિશિત ભટ્ટે ટ્રેડમાર્ક અને કોપીરાઇટ્સના મહત્વ અંગે જણાવ્યું હતું. ટ્રેડમાર્કના વિવિધ પ્રકાર, તેની એપ્લિકેશન પ્રોસેસ, અસરકારતા વગેરે અંગે પ્રેઝન્ટેશન પણ આપ્યું હતું. આ સાથે જ એડવોકેટ ઓમકાર આચાર્યએ MSMEને વર્તમાન સમયમાં પેટન્ટ ફાઇલ કરાવવી એ કેટલું મહત્વનું છે તે અંગે માહિતગાર કર્યા હતા. સરકાર તરફથી પેટન્ટ ફાઇલ કરવા પર અને વિમેન આંત્રપ્રિન્યોર તરીકે ફાઇલ કરવાથી મળતા લાભો અંગે જણાવ્યું હતું. એડવોકેટ ગૌરવ સોનીએ ઇન્ડસ્ટ્રીયલ ડિઝાઇન અંગે જણાવ્યું હતું કે, ડિઝાઇન હંમેશા નવી અને ઓરિજિનલ હોવી જોઇએ. પ્રશ્નોત્તરીકાળમાં વક્તાઓ દ્વારા IPR સંબંધિત વિવિધ પ્રશ્નોના જવાબ આપવામાં આવ્યા હતા.