ફી નિયમન:JG ઇન્ટરનેશનલ સ્કૂલે વધુ વસૂલેલી 3.17 લાખ ફી વાલીને પરત કરવાનો આદેશ

સોલા રોડ પર આવેલી જે.જી ઇન્ટરનેશનલ સ્કૂલના વાલીએ બાળકનો અભ્યાસ પૂરો થયા બાદ એફઆરસીમાં ફરિયાદ કરી હતી કે સ્કૂલે એફઆરસીએ નક્કી કરેલી ફી કરતા વધુ વસુલી છે. વાલીએ એફઆરસીને જણાવ્યું હતું કે ધો.11-12 સાયન્સ માટે સ્કૂલને 12 લાખ ચુકવ્યા છે, પરંતુ ઓર્ડર પ્રમાણે વાલીએ 9.16 લાખ ચુકવ્યા હોવાનું સાબિત થયું હતું, વધારાની રકમના કોઇ દસ્તાવેજ કમિટીને મળ્યા નથી. એફઆરસીએ સ્કૂલને આદેશ આપ્યો હતો કે વધુ વસુલેલી 3.17 લાખ ફી 15 દિવસમાં વાલીને પરત ન થાય તો સ્કૂલે 12 ટકા વ્યાજ આપવું પડશે.

વાલીએ એફઆરસીમાં ફરિયાદ કરી હતી કે, તેમની દિકરી ધો.11 અને 12માં 2017-18 અને 2018-19માં અભ્યાસ કરતી હતી. તે સમયે સ્કૂલની ફી 2.42 લાખ અને 2.54 લાખ હતી. સ્કૂલે બે વર્ષ માટે 12 લાખ ફી વસુલી હતી. સ્કૂલે એફઆરસી સામે રજુઆત કરી હતી કે ફરિયાદીએ 9.16 લાખ ફી આપી હતી.

આદેશનું પાલન ન થાય તો 5 લાખ દંડ થઈ શકે
ઓર્ડરમાં કમિટીએ જણાવ્યું છે કે સ્કૂલના પાસ થયેલા ઓર્ડર પ્રમાણે 5.99 લાખ રૂપિયા ફી નક્કી થયેલી છે. હિસાબો જોતા વાલીએ 9.16 લાખ સ્કૂલને આપ્યા છે. જેથી સ્કૂલે વધારાની રકમ પરત કરવા આદેશ કરાયો હતો. જો સ્કૂલ ફી પરત ન કરે તો પાંચ લાખ દંડ અને એફઆરસીએ નક્કી કરે તે વર્ષની ફીની ડબલ રકમ વાલીને પરત કરવી પડશે.