હાઈકોર્ટમાં ઝુલતા પુલની સુઓમોટો સુનાવણી:મોરબી નગરપાલિકાએ દુર્ઘટનાના 18 દિવસ પછી સોગંધનામામાં કબૂલ્યું, ‘આ બ્રિજ જ નહોતો ખોલવો જોઈતો’

અમદાવાદ17 દિવસ પહેલા
  • કૉપી લિંક

મોરબીની ઝુલતા પુલ દુર્ઘટના મામલે હાઇકોર્ટ દાખલ કરાયેલી સુઓમોટો PILમાં આજે મોરબી નગરપાલિકાએ સોગંદનામું રજૂ કરીને ઘટનાની જવાબદારી સ્વીકારી છે.સોગંદનામામાં કહ્યું છે કે, આ બ્રિજ જ નહોતો ખોલવો જોઈતો.હાઈકોર્ટે પાલિકાના પ્રમુખને આગામી સુનાવણીની તારીખ 24મી નવેમ્બરે હાઈકોર્ટમાં હાજર રહેવા આદેશ કર્યો છે. નગરપાલિકાએ જણાવ્યું હતું કે, અજંતાએ મોરબી નગરપાલિકાને પુલનું કયા પ્રકારનું રીપરીંગ કરાયું કે ફીટનેસ સર્ટિફિકેટ સહિતની વાતને લઇ જાણ કરાઇ ન હતી અને નગરપાલિકાની પૂર્વ પરવાનગી મેળવ્યા વિના જ ઝુલતો પુલ લોકો માટે ખુલ્લો મૂકી દીધો હતો. ટિકિટ વીન્ડો ઓપરેટર અને કંપનીના સુરક્ષા જવાનોએ ૩૦૦થી વધુ લોકોને પુલ પર જવાની મંજૂરી આપતાં આખરે આ કરૂણાંતિકા સર્જાઇ અને 135 નિર્દોષ લોકોના મોત નીપજયા હતા.

ચીફ ઓફિસરને રૂબરૂ કોર્ટમાં હાજર રહેવા આદેશ કર્યો
મોરબી નગરપાલિકાની હાઈ કોર્ટે ઝાટકણી કાઢતા કહ્યું હતું કે, બપોરે 4 વાગ્યા પહેલાં સોગંદનામું નહિ કરો તો એક લાખ દંડ ભરવા તૈયાર રહેજો. આથી બપોરે 4 વાગે મોરબી નગરપાલિકાએ સોગંદનામું રજૂ કરી દીધું હતું .નગરપાલિકા તરફથી આસિ. સોલિસિટર જનરલે એવી રજૂઆત કરી હતી કે, ડેપ્યુટી કલેક્ટર ચૂંટણી કામમાં વ્યસ્ત હોવાથી જવાબ રજૂ કરી શક્યા નથી. આથી ચીફ જસ્ટિસ અરવિંદ કુમાર અને જસ્ટિસ આશુતોષ શાસ્ત્રીની ખંડપીઠે ઠપકો આપ્યો હતો કે આ મુદ્દાને સહેજ પણ હળવાશથી લેવાની ભૂલ ન કરતા, નહિતર મુસીબત વધશે. ખંડપીઠે નગરપાલિકાના ચીફ ઓફિસરને રૂબરૂ કોર્ટમાં હાજર રહેવા આદેશ કર્યો છે.

કોર્ટના વલણને પારખીને બપોરે એફિડેવિટ ફાઇલ કરાઈ
હવે વધુ સુનાવણી 24મી તારીખે મુલત્વી રાખી છે. સુઓમોટો અરજીની સુનાવણી સવારે શરૂ થઈ ત્યારે મોરબી નગરપાલિકાએ એફિડેવિટ ફાઇલ નહિ થઈ હોવાની રજૂઆત કરતા ખંડપીઠે સખત નારાજગી વ્યક્ત કરી હતી. કોર્ટના વલણને પારખીને બપોરે એફિડેવિટ ફાઇલ કરી દેવામાં આવી હતી. ખંડપીઠે એવો સવાલ કર્યો હતો કે, બ્રિજ ક્યારથી બંધ કરવામાં આવ્યો હતો અને ક્યાં સુધી બંધ રહ્યો હતો. નગરપાલિકા તરફથી એવી રજૂઆત કરાઈ હતી કે, રાજકોટ કલેક્ટર અને અજંતા મેન્યુફેક્ચરિંગ વચ્ચે એમઓયુ કરાયો હતો. 9 વર્ષ માટે તેમને જવાબદારી સોંપી હતી, જેમાં પુલનું મેન્ટેનન્સ, મેનેજમેન્ટ અને વિઝિટિંગ ચાર્જ તમામ જવાબદારી અજંતાને સોંપવામાં આવી હતી. ત્યાર બાદ નવા એગ્રીમેન્ટ વગર પણ આ બ્રિજની જવાબદારી અજંતા કરતી હતી.

બ્રિજ કોની મંજૂરીથી ખુલ્લો મુકાયો તે સ્પષ્ટતા ન કરી
20-9-2021માં અજંતાએ નગરપાલિકાના ચીફ ઓફિસરને જાણ કરી હતી કે, બ્રિજની હાલત ખરાબ છે, તેની તાત્કાલિક મરામત જરૂરી છે. ડ્રાફટ એગ્રિમેન્ટ મંજૂરી માટે મોકલી આપ્યો હતો. પાલિકાના ચીફ ઓફિસર અને અજંતા વચ્ચે 15 વર્ષનો કરાર થયો હતો, પરંતુ જનરલ બોડીની મીટિંગમાં તેની મંજૂરી લેવાની બાકી હતી, પરંતુ મોરબી પાલિકાની જનરલ મીટિંગ થઈ જ નહિ અને એગ્રીમેન્ટને જનરલ બોડીની મિટીંગમાં મુકાયો જ નહિ. કંપનીએ કોઈ મંજૂરી વગર શરૂ કરી દીધો. દરમિયાન આ ઘટના બની. એફિડેવિટમાં બ્રિજ કોણે અને કોની મંજૂરીથી ખુલ્લો મૂક્યો તે અંગે કોઈ સ્પષ્ટતા જ નથી, પરંતુ અજંતાએ નગરપાલિકા પાસેથી કોઈ મંજૂરી મેળવ્યા વગર ખુલ્લો મૂક્યો હોવાનું સાબિત થાય છે. મોરબીના પ્રિન્સિપાલ ડિસ્ટ્રિક્ટ જજને મોરબી નગરપાલિકાને નોટિસ મોકલી આપવા હાઈકોર્ટે આદેશ કરતા સ્પશિયલ બિલિફ દ્વારા નોટિસ મોકલાઈ હતી.

હાઇકોર્ટના વેધક સવાલ | હવે સરકારે જવાબ આપવા પડશે

  • ​​​​નગરપાલિકા અને અજન્ટા કંપની વચ્ચે 16-6-2008 થી 15-6-2017 સુધી 9 વર્ષના એમઓયુ હતા, પરંતુ 15-6-2017 પછી એમઓયુ પૂર્ણ થયા પછી પણ આ બ્રિજની જવાબદારી અજન્ટાને કોણે આપી? બ્રિજ ચાલુ કરવાને યોગ્ય છે કે નહીં તે કોણે નક્કી કર્યું?
  • સરકારે ટેન્ડર પ્રક્રિયા વગર જ અજન્ટાને બ્રિજની કામગીરી સોંપી દીધી હોય તેમ જણાય છે. રાજકોટ કલેક્ટરે એમઓયુનો સમય પૂર્ણ થયા પછી શું પગલાં લીધા? બીજી વખત કોઇ કરાર કરવાની પ્રક્રિયા હાથ ધરી હતી કે નહીં?
  • ઓમઓયુનો સમય પૂર્ણ થયા પછી પણ અજન્ટા કંપની બ્રિજની મરમ્મત અને તેનાથી ઉપજતા પૈસા કેમ ઉઘરાવતી હતી? કલેક્ટર પાસેથી વધુ સમયનો કોઇ કરાર કરવા કંપની તરફથી કોઇ કાર્યવાહી થઇ છે કે નહીં?
  • 8-3-2020 થી 25-10-2020 સુધી બ્રિજ બંધ હતો. આ દરમિયાન બ્રિજ ચાલુ કરવા યોગ્ય છે કે નહીંં તે માટે સર્ટિફિકેટ મેળવવામાં આવ્યું હતું કે નહીં? આ સર્ટિફિકેટ કયા સત્તાધીશો પાસેથી મેળવવાનું હતું? આવું સર્ટિફિકેટ કોણ માંગી શકે?
  • 15-6-2017એ એમઓયુ પૂર્ણ થયા પછી સરકારે કલેક્ટર, મ્યુનિસિપાલિટીને નવા ટેન્ડર માટે કોઇ કાર્યવાહી કરવા કોઇ પગલાં લીધા છે કે નહીં? સરકારે બન્ને ઓથોરિટીને આ મામલે કોઇ કાર્યવાહી કરવા આદેશ કર્યો છે કે નહીં?
  • 15-6એ એમઓયુ પૂર્ણ થયા બાદ રિન્યુ પ્રક્રિયા હાથ ધરી હતી?
  • ગુજરાત મ્યુનિસિપાલિટી એકટ 1963ની કલમ 65 હેઠળ મોરબી નગરપાલિકાએ નિયમોનું પાલન કર્યુ છે કે નહીં?
અન્ય સમાચારો પણ છે...