અમદાવાદમાં J&K પોલીસનું સર્ચ ઓપરેશન:મહાઠગ કિરણ પટેલે પ્રિન્ટિંગ પ્રેસ સંચાલકને ધમકાવી વિઝિટિંગ કાર્ડ છપાવ્યાનું ખૂલ્યું

જમ્મુ-કાશ્મીર પોલીસે પકડેલા ગુજરાતના ઠગ કિરણ પટેલે PMOના અધિકારી હોવાની ઓળખ આપી હતી. જેનું વિઝિટિંગ કાર્ડ પણ બનાવ્યું હતું. ત્યારે હવે તપાસ અમદાવાદ સુધી પહોંચી છે. અમદાવાદના જ પ્રિન્ટિંગ પ્રેસમાં વિઝિટિંગ કાર્ડ તથા અન્ય કાર્ડ બનાવ્યાં હતાં. જેથી જમ્મુ-કાશ્મીર પોલીસ અમદાવાદ પહોંચી હતી અને પ્રિન્ટિંગ પ્રેસમાં સર્ચ કર્યું હતું. મહાઠગે મહિલા સંચાલકને ધમકાવીને કાર્ડ છપાવ્યાનું સામે આવ્યું છે.

જેકે પોલીસે પ્રિન્ટિંગ પ્રેસના સંચાલકનું નિવેદન લીધું
સૂત્રોનું કહેવું છે કે, જમ્મુ-કાશ્મીર પોલીસે મણિનગર સ્થિત આકાંક્ષા પ્રિન્ટિંગ પ્રેસનાં મહિલા સંચાલકનું નિવેદન નોંધ્યું છે. જેમાં તેમણે જણાવ્યું હતું કે, ફેબ્રુઆરીની શરૂઆતમાં કિરણ પટેલ તેમને ત્યાં પ્રધાનમંત્રી ઓફિસના નામે વિઝિટિંગ કાર્ડ છપાવવા આવ્યો હતો. જો કે, તેમણે સત્તાવાર લેટરપેડ વગર કાર્ડ છાપવાની ના પાડતાં કિરણ પટેલે મહિલાને ધમકાવી પોતાને મિટિંગમાં જવાનું મોડું થતું હોવાનું કહી દસેક કાર્ડ છપાવ્યા હતા. પોલીસે હાર્ડડિસ્ક અને બીજા કેટલાક ડોક્યુમેન્ટ્સ કબજે કર્યા છે.

મણિનગરની આકાંક્ષા ક્રિએશનમાં વિઝિટિંગ કાર્ડ છપાવ્યાં
કિરણ પટેલે પોતાની ઓળખ PMOના અધિકારી તરીકે તો આપી જ હતી. સાથે સાથે રોફ જમાવવા PMOના અધિકારી હોવાનું વિઝિટિંગ કાર્ડ પણ બનાવ્યું હતું. અમદાવાદના મણિનગરના પ્રિન્ટિંગ પ્રેસ આકાંક્ષા ક્રિએશનમાં વિઝિટિંગ કાર્ડ છપાવ્યાં હતાં. કિરણ પટેલની ધરપકડ બાદ ખુલાસો થતાં જમ્મુ-કાશ્મીર પોલીસ અમદાવાદ પહોંચી હતી. અમદાવાદમાં જમ્મુ-કાશ્મીર પોલીસે આકાંક્ષા ક્રિએશનમાં સર્ચ કર્યું હતું. જોકે, કોઈ પુરાવા મળ્યા નહોતા.

હાર્ડડિસ્ક, ડોક્યુમેન્ટ સહિતનો મુદ્દામાલ કબજે કર્યો
જમ્મુ-કાશ્મીર પોલીસે આકાંક્ષા ક્રિએશનની હાર્ડડિસ્ક, ડોક્યુમેન્ટ સહિતનો મુદ્દામાલ કબજે કર્યો હતો. આ ઉપરાંત પ્રિન્ટિંગ પ્રેસના માલિકનું નિવેદન પણ લીધું હતું. જમ્મુ-કાશ્મીર પોલીસ કિરણ પટેલની ધરપકડ બાદ ત્રીજી વખત અમદાવાદ આવી હોવાનું જાણવા મળ્યું છે. જમ્મુ-કાશ્મીર પોલીસ જરૂર મુજબ કિરણ પટેલના ઘરે પણ સર્ચ કરશે. હાલ કિરણ પટેલનાં પત્ની માલિની પટેલ અને 2 દીકરીઓ ઘરે છે.

મહાઠગ કિરણના ઘરે સર્ચ, ગૃહમંત્રાલયે રિપોર્ટ મગાવ્યો
જમ્મુ-કાશ્મીરમાં સુરક્ષા એજન્સીઓ ઉપરાંત ગુજરાતમાં પણ સંખ્યાબંધ લોકોને મૂર્ખ બનાવનારા ઠગ કિરણ પટેલ ઉર્ફ બંસીના ઘોડાસર સ્થિત ઘરે ગુજરાત એટીએસ અને જમ્મુ-કાશ્મીર પોલીસે બે વાર સર્ચ કરી સંખ્યાબંધ પુરાવા એકઠા કર્યા છે. બીજી તરફ ગુજરાત એટીએસ દ્વારા કિરણ પટેલે ગુજરાતમાં આચરેલાં કૌભાંડોનો વિગતવાર રિપોર્ટ ગૃહ વિભાગને સોંપ્યો હોવાનું સૂત્રોનું કહેવું છે.

કિરણ પટેલનાં કૌભાંડોનો રિપોર્ટ ગૃહ વિભાગને સોંપ્યો
ટૂંક સમયમાં રાજ્યનો ગૃહ વિભાગ કિરણ પટેલનાં તમામ કારસ્તાનોની તપાસ એટીએસને સોંપશે તેવી શક્યતા છે. બીજી તરફ જમ્મુ-કાશ્મીર પોલીસે મણિનગર સ્થિત એક પ્રિન્ટિંગ પ્રેસના મહિલા સંચાલકની પૂછપરછ પણ કરી હતી.

ગુજરાતમાં તેનાં કારસ્તાનોની તપાસ તેજ બની
કિરણ પટેલની જમ્મુ-કાશ્મીરમાં ધરપકડ બાદ હવે ગુજરાતમાં તેનાં કારસ્તાનોની તપાસ તેજ બની છે. એક તરફ કાશ્મીર પોલીસ ગુજરાતમાં જરૂરી પુરાવા અને સાક્ષીઓને શોધી રહી છે ત્યારે બીજી તરફ ગુજરાત એટીએસ દ્વારા પણ વિગતવાર રિપોર્ટ તૈયાર કરીને સરકારના ધ્યાન પર મૂક્યો છે. સૂત્રોનું કહેવું છે કે, ગૃહ વિભાગ આખા કેસની તપાસ ગુજરાત એટીએસને સોંપે તેવી શક્યતા છે.

સરકારના આદેશ બાદ ઠગ કિરણ પટેલની મુશ્કેલીઓ વધશે
એટીએસનાં સૂત્રોનું કહેવું છે કે, કિરણ પટેલે જે લોકોને પોતાની જાળમાં ફસાવ્યા છે અથવા જેમને પી.એમ.ઓ.માં એડિ. ડિરેક્ટરની ઓળખ આપી રુઆબ બતાવ્યો છે તેવા સંખ્યાબંધ લોકોની ઓળખ પણ કરી લેવાઈ છે. સરકારનો આદેશ મળ્યા બાદ આવા લોકોને બોલાવી તેમની સાથે ઠગાઈ થઈ છે કે કેમ તે અંગે પણ તપાસ કરવામાં આવશે. ટૂંકમાં સરકારના આદેશ બાદ ઠગ કિરણ પટેલની મુશ્કેલીઓ વધશે. અગાઉ તેની સામે નોંધાયેલા ગુના અને તે જે કેસમાં જામીન પર હોય તે કેસમાં પણ તેના જામીન રદ કરવા સુધીની પોલીસ કાર્યવાહી કરી શકે છે.

વડોદરામાં ગરબાના આયોજન બાદ ડેકોરેટર્સને રૂપિયા નહીં ચૂકવવાની ઠગ કિરણ પટેલ વિરુદ્ધ ફરિયાદ નોંધાઈ હતી. જેમાં ડેકોરેટર્સ પારિતોષભાઈએ કેટલાક ચેક મીડિયાને બતાવ્યા હતા જે ઠગ કિરણ પટેલની પત્ની માલિની પટેલે આપ્યા હતા.

મહિલા સંચાલકને ધમકાવીને વિઝિટિંગ કાર્ડ છપાવ્યાં
સૂત્રોનું કહેવું છે કે, જમ્મુ-કાશ્મીર પોલીસે મણિનગર સ્થિત આકાંક્ષા પ્રિન્ટિંગ પ્રેસનાં મહિલા સંચાલકનું નિવેદન નોંધ્યું છે. જેમાં તેમણે જણાવ્યું હતુ કે, ફેબ્રુઆરીની શરૂઆતમાં કિરણ પટેલ તેમને ત્યાં પ્રધાનમંત્રી ઓફિસના નામે વિઝિટિંગ કાર્ડ છપાવવા આવ્યા હતા. જો કે, તેમણે સત્તાવાર લેટરપેડ વગર કાર્ડ છાપવાની ના પાડતા કિરણ પટેલે મહિલાને ધમકાવી પોતાને મિટિંગમાં જવાનું મોડું થતું હોવાનું કહી દસેક કાર્ડ છપાવ્યાં હતાં. પોલીસે હાર્ડડિસ્ક અને બીજા કેટલાક ડોક્યુમેન્ટ્સ કબજે કર્યા છે.