મદદ:કોરોનામાં કરદાતાને મદદરૂપ થવાનો હેતુ, ઈન્કમટેક્સ વિભાગે રૂ.1.40 લાખ કરોડના રિફંડ છૂટાં કર્યાં

ઇન્કમટેક્સ ડિપાર્ટમેન્ટે કોરોનામાં કરદાતાને મદદરૂપ થવા રૂ. 1.40 લાખ કરોડના રિફંડ આપ્યાં છે. જેમાં શહેરના 12 હજાર કરદાતાને 18 હજાર કરોડના રિફંડ અપાયા છે. બાકી રહેલા કરદાતાને મોબાઈલ-ઈમેઈલથી જાણ કરાઈ છે.

સીબીડીટીએ 1 એપ્રિલ-20 સુધીમાં રૂ. 1.40 લાખ કરોડના રિફંડ કરદાતાને આપ્યા છે. ઈન્કમટેક્સ ડિપાર્ટમેન્ટે બહાર પાડી યાદી મુજબ 69,68 લાખ કરદાતાને 1.40 લાખ કરોડ રકમ 2017-18 અને 18-19ના વર્ષના કરદાતાઓ દ્વારા ફાઇલ કરેલા રિટર્નની માગેલી અરજીનો નિકાલ કર્યો છે. જે સરકારે જાહેર કરેલા આત્મનિર્ભર પેકેજના 10 ટકા જેટલી થવા જાય છે. આમ કોરોનાના સમયમાં ઇન્ક્મટેક્સ ડિપાર્ટમેન્ટે કાર્ય ચાલુ રાખીને કરદાતાઓને આ સમયમાં મદદરૂપ થવા આપવાની થતી મળવાપાત્ર રકમ તાત્કાલિક છૂટી કરી છે.

ઘણાં બધાં કરદાતાઓ કે જેમણે પોતાના રિટર્ન યોગ્ય રીતે ફાઇલ ન કર્યા હોય કે બેન્ક એકાઉન્ટની યોગ્ય માહિતી ન આપી હોય તેવા કરદાતાઓને ઇન્કમટેક્સે મોબાઇલ તેમજ ઇ-મેઇલ પર મેસેજ કરી તેને ઓનલાઇન સબમિટ કરવા જણાવાયું છે. જેથી આવા કરદાતાઓને મળવા પાત્ર રકમ તાત્કાલિક ધોરણ છૂટી કરી શકાય.