હાલાકી:કોરોનાકાળમાં GSTએ એકતરફી ઓર્ડર કરતાં કરદાતા મુશ્કેલીમાં

ગુજરાત સ્ટેટ જીએસટી ડિપાર્ટમેન્ટે તાજેતરમાં વર્ષ 2016-17ના વર્ષની કાર્યવાહીને લઇને વેપારીઓને કોવિડ સમયમાં ફોન કરીને એસેસમેન્ટના દસ્તાવેજો સાથે દોડાવ્યા છે. ગુજરાત સેલટેક્સ બાર એસોસિએશને હાઇપીચ એસેસમેન્ટ, મોટી રકમના ઓર્ડર અને એસેસમેન્ટ માટે સમય આપવા વિનંતિ કરી હતી. જેના માટે એસોસિએશનના સભ્યો રાજ્યના નાણામંત્રીને મળ્યા હતા. પરંતુ મુખ્ય ચીફ કમિશનર રજા પર હોવાથી જરૂરી સૂચનો ન અપાતા કરદાતાઓની ફરિયાદો ઉઠી છે કે, ઘણા બધા કેસમાં એક્સપાર્ટે ઓર્ડર કરી દેવાતા કરદાતાઓને મોટી રકમની જવાબદારી આવી પડી છે.

જે કરદાતા ડેટા આપી રહ્યા છે, તેમને વધારાનો ડેટા ઝડપથી આપી દેવા જણાવાયું છે. તેમજ તેમને 15 ડિસેમ્બર પહેલા બાકી ડેટા આપવામાં નહીં આવે તો ઓર્ડર કરી દેવાની ધમકી મળી રહી છે. આમ કરદાતાઓ કોવિડ સમયમાં આ ડેટા આપવા દોડાદોડી કરી રહ્યાં છે. જરૂરી સૂચના નાણામંત્રી દ્વારા કરાય તેવી એસોસિએશન દ્વારા રજૂઆત કરાઇ છે.