નાણાકીય સાક્ષરતા સપ્તાહ:એક વર્ષમાં RBIને વિવિધ બેન્કો સામેની 16 હજાર ફરિયાદ મળી

8થી 12 ફેબ્રુઆરી નાણાકીય સાક્ષરતા સપ્તાહ તરીકે ઊજવાય છે. જોકે કોરોના બાદ ગ્રાહકોની બેન્ક સામેની ફરિયાદોમાં વધારો થયો છે. બેન્ક દ્વારા અપાતી સર્વિસ અને બેન્કના કર્મચારીઓના વર્તનને લઈને ગ્રાહકો દ્વારા આરબીઆઈમાં ફરિયાદ કરવામાં આવી રહી છે. 2018-19ના વર્ષમાં માત્ર અમદાવાદમાં 9600 ફરિયાદો મળી હતી, જે વર્ષ 2019-20માં વધીને 16 હજાર થઇ હતી.

આરબીઆઈ અમદાવાદના ડિરેક્ટર એસ.કે. પાનીગ્રહીએ જણાવ્યું હતું કે, નાણાકીય સાક્ષરતાને કારણે ગ્રાહકો જાગૃત થયા છે અને તેમને પડતી મુશ્કેલી અમને જણાવી રહ્યાં છે. તેમણે જણાવ્યું કે, કોવિડના વર્ષમાં માત્ર અમદાવાદમાં 16 હજાર ફરિયાદો બેન્કો સામેની મળી હતી, જેમાં સૌથી વધારે ફરિયાદો સ્ટેટ બેન્ક ઓફ ઇન્ડિયા, બેન્ક ઓફ બરોડા અને એચડીએફસી બેન્ક સામેની છે. બીજી તરફ કોરોનાનું બહાનું આગળ ધરીને નાગરિકોને ફાટેલી ચલણી નોટ અને નવી નોટ આપતી વિન્ડો છેલ્લા માર્ચ મહિનાથી બંધ કરવામાં આવી છે.