રાજ્ય સરકારનો નિર્ણય:વન્યપ્રાણીઓના હુમલામાં માનવમૃત્યુ થાય તો હવે રૂ.5 લાખ અને ગાય-ભેંસના મૃત્યુના કિસ્સામાં રૂ.50 હજારનું વળતર ચૂકવાશે

અમદાવાદ12 દિવસ પહેલા
  • કૉપી લિંક
સિંહણના મારણની ફાઈલ તસવીર. - Divya Bhaskar
સિંહણના મારણની ફાઈલ તસવીર.
  • વન તથા અભયારણ્ય અને એની નજીકના વિસ્તારમાં પ્રાણીઓના હિંસક હુમલાથી મૃત્યુના કિસ્સામાં સહાયમાં વધારો
  • સિંહ, વાઘ, દીપડા, રીંછ, મગર, વરુ, જરખ અને જંગલી ભૂંડ દ્વારા માનવમૃત્યુ-ઇજા તથા પશુમૃત્યુના કિસ્સામાં વળતર

રાજયમાં આવેલ વન તથા અભ્યારણ અને તેની નજીકના વિસ્તારમાં રહેતા વન્યપ્રાણીઓના હુમલાથી માનવ મૃત્યુ-ઈજા તથા પશુ મૃત્યુની ઘટનાઓ બનતી હોય છે. આવા કિસ્સાઓમા નાગરિકોને ચૂકવાતા વળતર-સહાયના દરોમા રાજ્ય સરકારે નોંધપાત્ર સુધારો કરી નવા દરો નિયત કર્યા છે.

માનવમૃત્યુના કિસ્સામાં સહાયમાં રૂ.1 લાખનો વધારો
રાજ્યના વન અને પર્યાવરણ વિભાગની યાદીમાં જણાવ્યા અનુસાર, વન્યપ્રાણીઓના હુમલાથી માનવમૃત્યુ-ઈજા તથા પશુમૃત્યુના પ્રસંગોએ રાજ્ય સરકાર દ્વારા આપવામાં આવતા વળતરના નવા દરમાં વધારો કરવામાં આવ્યો છે. માનવમૃત્યુના કિસ્સામાં પ્રત્યેક વ્યક્તિદીઠ પહેલાં રૂપિયા 4 લાખની સહાય અપાતી હતી, એને વધારીને હવે રૂ.5 લાખની સહાય ચૂકવાશે. એ જ રીતે માનવને ઇજા સંદર્ભે 40 ટકાથી 60 ટકા, અપંગતા હોય તેવા કિસ્સામાં રૂપિયા 59,100ને બદલે હવે રૂ. 1 લાખની સહાય અપાશે. 60 ટકાથી વધુ અપંગતા હોય તો રૂપિયા 2 લાખ અને 3 દિવસ અથવા તેથી વધુ સમય ઇજા પામેલી વ્યક્તિ હોસ્પિટલમાં દાખલ રહે તો પહેલાં સહાય આપવામાં આવતી નહોતી, એને બદલે હવે રૂપિયા 10,000ની સહાય ચૂકવાશે.

હિંસક પશુના હુમલા કિસ્સામાં આ સહાય ચૂકવાશે

દૂધાળાં પશુનાં મૃત્યુના કિસ્સામાં સહાયમાં વધારો
આ ઉપરાંત દૂધાળાં પશુઓ માટે પણ પ્રત્યેક પશુદીઠ મૃત્યુ સહાયના નવા દરો નિયત કરાયા છે, જે અંતર્ગત ગાય-ભેંસ માટે રૂપિયા 30 હજારને બદલે હવે રૂ. 50 હજાર, ઊંટ માટે રૂપિયા 30 હજારને બદલે રૂ.40 હજાર, ઘેટાં-બકરાં માટે રૂપિયા 3 હજારને બદલે રૂપિયા 5 હજારની સહાય તથા બિનદૂધાળાં પશુઓમાં ઊંટ ઘોડા-બળદ માટે રૂપિયા 25 હજાર તથા રેલ્લો (પાડો-પાડી), ગાયની વાછરડી- ગધેડો-પોની વગેરે માટે રૂપિયા 16 હજારને બદલે રૂપિયા 20 હજારની સહાય ચૂકવાશે.

સિંહ, વાઘ, રીંછ, મગર સહિતનાં પ્રાણીઓના હુમલામાં વળતર ચૂકવાશે
આ નવા દરોનો અમલ તા.5મી જાન્યુઆરીથી કરાશે અને આ ઠરાવ બહાર પાડતાં પહેલાંના બનાવોમાં જો કોઇ વળતર ચૂકવવાનું બાકી હોય તો તે જે-તે સમયના પ્રવર્તમાન ઠરાવોના દર મુજબ ચૂકવવાનું રહેશે. અત્રે ઉલ્લેખનીય છે કે વન્યપ્રાણી સંરક્ષણ અધિનિયમ-1972માં દર્શાવેલી વન્યપ્રાણીની વ્યાખ્યામાં સમાવેશ થતાં વન્યપ્રાણીઓ, જેવા કે સિંહ, વાઘ, દીપડા, રીંછ, મગર, વરુ, જરખ અને જંગલી ભૂંડ દ્વારા માનવમૃત્યુ અથવા ઇજા તથા પશુમૃત્યુ થયેલા હોય તેવા કિસ્સામાં આ વળતર ચૂકવવાનું રહેશે.

અન્ય સમાચારો પણ છે...