સલામત સવારી:ગુજરાતની એસટીને સૌથી સલામત બસ સેવાનો એવોર્ડ, 1 લાખ કિમીએ સૌથી ઓછા અકસ્માત

કેન્દ્ર સરકારના માર્ગ પરિવહન મંત્રાલયે સતત ત્રીજી વખત ગુજરાત એસટી કોર્પોરેશનને સૌથી સલામત બસ સેવાનો એવોર્ડ આપ્યો છે. કેન્દ્રીય માર્ગ પરિવહન મંત્રી નીતિન ગડકરીના હસ્તે નવી દિલ્હીમાં એસ.ટી. નિગમને આગામી18 જાન્યુઆરીએ એવોર્ડ વિજેતા ટ્રોફી ઉપરાંત 2 લાખનો પુરસ્કાર એનાયત કરાશે. ગુજરાત એસટીએ આ સાથે ‘એસ.ટી.અમારી-સલામત સવારી’ સૂત્રને સાર્થક કર્યું છે. ગુજરાત રાજ્યમાર્ગ વાહન વ્યવહાર નિગમે પ્રતિ 1 લાખ કિલોમીટરે સલામત,સુરક્ષિત અને ઓછામાં ઓછા અકસ્માતથી સંચાલન કરીને 7500 ફલીટ સર્વિસની કક્ષામાં આ એવોર્ડ પ્રાપ્ત કર્યા છે.

રાજ્યમાં 1 લાખ કિલો મીટરે થતા આવા અકસ્માતનું પ્રમાણ સૌથી ઓછું 0.06 રહ્યું છે. એસ.ટી.નિગમે દરરોજના 34 લાખ કિ.મી.ના સંચાલનથી 25 લાખ જેટલા મુસાફરને પરિવહનની સુવિધા પુરી પાડી છે. રાજયમાં છેલ્લા 10 વર્ષ એટલે કે 2009-10થી 2019-2020 સુધીમાં આવા અકસ્માતોનું પ્રમાણ 0.11થી ઘટીને અત્યંત નીચું 0.06 થઇ ગયું છે.