વિધાનસભાની સેમિ-ફાઇનલ:મનપામાં ટિકિટ ન મળવાથી નારાજ ભાજપના કાર્યકરોની સી.આર. પાટીલે માફી માગી

રાજ્યમાં 6 મનપા બાદ યોજાનારી 31 જિલ્લા પંચાયતો અને 231 તાલુકા પંચાયતો તેમજ 56 નગરપાલિકા માટે 28 ફેબ્રુઆરીએ મતદાન થશે, જેની 2 માર્ચના રોજ મતગણતરી કરવામાં આવશે. બીજા તબક્કાની આ ચૂંટણીના ઉમેદવારો નક્કી કરવા માટે ભાજપની 7 ફેબ્રુઆરીથી 10 ફેબ્રુઆરી દરમિયાન પાર્લમેન્ટરી બોર્ડની બેઠક મળી હતી. આ બેઠક બાદ હવે પંચાયત અને પાલિકાના મુરતિયાઓની જાહેરાત કરવામાં આવશે. આ પહેલાં ભાજપે 6 મનપા માટે 576 ઉમેદવાર જાહેર કર્યા હતા. જોકે ઉમેદવારો જાહેર થતાં જ કાર્યકરોમાં નારાજગી જોવા મળી હતી અને બળવો કરવાના મૂડમાં આવી ગયા હતા, જેને પગલે ગૃહ રાજ્યમંત્રી પ્રદીપસિંહ જાડેજાએ સમજાવટના પ્રયાસો હાથ ધરવા પડ્યા હતા. આ નારજગીને ધ્યાનમાં લઈ આજે ભાજપના પ્રદેશ પ્રમુખ સી.આર.પાટીલે કાર્યકરોની માફી માગી છે.

પાટીલે ટ્વીટ કરી લખ્યું છે કે જેમને ટિકિટ નથી આપી શકાઇ એ તમામ કાર્યકર્તાઓની હું હૃદયપૂર્વક માફી માગું છું, એ સક્ષમ હોવા છતાં ટિકિટની મર્યાદા હોવાને કારણે અમે તેમને સમાવી શક્યા નથી. પૂર્ણ આશા છે કે એ સૌ આ ઇલેક્શનમાં પૂરી તાકાત સાથે ભાજપના ઉમેદવારોને જિતાડવા તનતોડ મહેનત કરશે અને પાર્ટીના ઉમેદવારોને જિતાડશે.

મહાનગરો કરતાં ગામડાંનું રાજકારણ અલગ
સ્થાનિક સ્વરાજ્યમાં જિલ્લા પંચાયત, તાલુકા પંચાયત અને નગરપાલિકાઓમાં પક્ષની ભેદરેખા અત્યંત પાતળી હોય છે અને છેલ્લાં પાંચ વર્ષમાં આ પ્રકારના અનેક પક્ષાંતરો થયા છે. ગ્રામીણક્ષેત્રનું રાજકારણ મહાનગરો કરતાં અલગ હોય છે અને ત્યાં વ્યક્તિગત સંબંધો તથા વ્યક્તિગત વર્ચસ્વ વધુ ભૂમિકા ભજવતાં હોય છે, જેથી આ માપદંડથી રહી ગયેલા લોકોની ભૂમિકા શું હશે એ અંગે પણ ભાજપમાં ચર્ચા છે અને નવાં સમીકરણો બને એવી શક્યતા પણ નકારાતી નથી.

કુલ 6,590 વોર્ડમાં ભાજપ-કોંગ્રેસ વચ્ચે ટક્કર થશે

3.89 લાખ કર્મચારીઓ-પોલીસ ઇલેક્શન ડ્યૂટીમાં જોડાશે