બેદરકારી:કાંકરિયા લેક ખૂલ્યાના 88 દિવસ પછી પહેલીવાર 17 હજાર લોકો આવ્યા, ભારે ભીડથી સોશિયલ ડિસ્ટન્સ ન જળવાયું

લોકડાઉન ખૂલ્યા બાદ ઓક્ટોબરથી કાંકરિયા લેક લોકો માટે ખૂલ્લું મૂકવામાં આવ્યું હતું. 88 દિવસ પછી પહેલીવાર રવિવારે મોટી સંખ્યામાં લોકો ફરવા માટે ઊમટી પડ્યા હતા. સવારે 9 વાગ્યાથી સાંજે 5 વાગ્યા સુધીમાં કુલ 17,572 લોકોએ કાંકરિયાની મુલાકાત લેતા 1.64 લાખની આવક થઈ હતી. જોકે, કોરોનાની કોઈ પણ પ્રકારની ગાઈડલાઈન્સનું પાલન થયું ન હતું.

હજારોની સંખ્યામાં ભેગા થયેલા લોકો વચ્ચે સોશિયલ ડિસ્ટન્સિંગનો સરેઆમ ભંગ જોવા મળ્યો હતો અને સંખ્યાબંધ લોકો માસ્ક વિના બિનધાસ્ત ફરતા પણ જોવા મળ્યા હતા. માસ્ક પહેરેલા લોકો પણ સેલ્ફી લેવા માટે માસ્ક ઉતારતા જોવા મળ્યા હતા.