ક્રિકેટ રમવા બાબતે હુમલો:ચાંદલોડિયામાં ક્રિકેટ બાબતે બે પરિવાર વચ્ચે મારામારી

ચાંદલોડિયામાં રામબાગ સોસાયટીના ધાબા ઉપર ક્રિકેટ રમતા છોકરાઓને ઠપકો આપતા બે પરિવારના સભ્યો વચ્ચે મારામારી થતા સોલા હાઈકોર્ટ પોલીસ સ્ટેશનમાં સામસામે ફરિયાદ કરવામાં આવી છે. રામબાગ સોસાયટીમાં રહેતા જગદીશ હાજાભાઈ રાઠોડ(ઉં.28) રવિવારે સાંજે નોકરીએથી ઘરે આવ્યા ત્યારે ધાબા ઉપર કેટલાક છોકરાઓ ક્રિકેટ રમી રહ્યાં હોવાથી ઘરમાં બેટ અને કૂદવાનો અવાજ આવતો હતો.

જગદીશભાઈએ છોકરાઓને ઠપકો આપતા તેમના પડોશીના દીકરા ધ્રુવે જગદીશભાઈ સાથે મારામારી કરી હતી. દરમિયાનમાં ધ્રુવની માતા રાખીબહેન, પિતા ખુશાલભાઈ તેની મોટી બહેન હીમા ધાબે આવી જતાં જગદીશભાઈની માતા વિનુબહેન,પિતા હાજાભાઈ તેમજ બહેન સોનલ પણ ધાબે આવી ગયા હતા. જ્યાં બંને પક્ષના સભ્યો વચ્ચે છૂટા હાથની તેમજ બેટ અને લાકડી વડે મારામારી થઇ હતી.