જાહેરનામાનો ભંગ:ગ્રીન ફાયર ક્રેકર્સ સિવાયના ફટાકડા વેચતા 7 સામે ગુનો, સરખેજમાંથી ચાર, સાબરમતીમાંથી 2 અને રાણીપમાંથી 2 ફેરિયાની ધરપકડ

શહેરના સરખેજ, રાણીપ અને સાબરમતી વિસ્તારમાં લારીમાં ગ્રીન ફાયર ક્રેકર્સ સિવાયના ફટાકડા વેચતા 7 ફેરિયા સામે પોલીસે ગુનો નોંધી ધરપકડ કરી છે. આંબલી - બોપલ બ્રિજ ઉપર લારીમાં ગ્રીન ફાયર ક્રેકર્સ સિવાયના ફટાકડા વેચી રહેલા નટવર પટણી, સરખેજ ઢા‌ળ ચાર રસ્તા ઉપર લારીમાં ગ્રીન ફાયર ક્રેકર્સ સિવાયના ફટાકડા વેચતા ઈશાક મહંમદ શેખ, લતીફ પીલુડિયા અને સરખેજ ગામ ગોલ્ડન હાઉસ પાસે લારીમાં વેચાણ કરી રહેલા સરફરાજ મેમણ(20) વિરુદ્ધ પોલીસે ગુનો નોંધી તેમની ધરપકડ કરી હતી.

આ ઉપરાંત સાબરમતી રામનગર પૂખરાજ હોસ્પિટલ સામે ફટાકડા ફોડી રહેલા નરેન્દ્રકુમાર નાઈ અને વિપુલ નાઈ (ચાંદખેડા)ની સાબરમતી પોલીસે ધરપકડ કરી હતી. જ્યારે રાણીપ શાક માર્કેટમાં પોલીસની મંજૂરી વગર તેમજ ફાયર સેફટીની કોઇ વ્યવસ્થા રાખ્યા વગર લારીમાં ગ્રીન ફાયર ક્રેકર્સ સિવાયના ફટાકડાનું વેચાણ કરતા પ્રકાશભાઇ પટણીની રાણીપ પોલીસે ધરપકડ કરી હતી. રાણીપ બલોલનગર ચાર રસ્તા પાસે નિયમોનું પાલન કર્યા વગર લારીમાં ફટાકડાનું વેચાણ કરી રહેલા સીતાબહેન બાબુભાઇ પટણી વિરુદ્ધ રાણીપ પોલીસે ગુનો નોંધી તેમની ધરપકડ કરી હતી.