બિલ કૌભાંડનો મુદ્દો:કોર્પોરેશને કિન્નાખોરી રાખીને સીમ્સને નોટિસ આપી : AHNA

સીમ્સ હોસ્પિટલે કોર્પોરેશનના સ્ટાફ સામે એન્ટિ કરપ્શન બ્યુરો (એસીબી)માં કરેલી ફરિયાદ અંગે કિન્નાખોરીને રાખીને મ્યુનિ.એ સીમ્સ હોસ્પિટલને અપાયેલી શો-કોઝ નોટિસને આહના કડક શબ્દોમાં વખોડે છે. તેમજ સિમ્સ હોસ્પિટલને આપવામાં આવેલી શો-કોઝ નોટિસ તાત્કાલિક પાછી ખેંચવાની માંગણી સાથે આ બાબતે યોગ્ય પગલા ભરવા આહનાએ રાજ્ય સરકારને વિનંતી કરી છે.

અમદાવાદ હોસ્પિટલ્સ એન્ડ નર્સિંગ હોમ્સ ઓસોશિયેશન (AHNA)ના પ્રેસિડેન્ટ ડો. ભરત ગઢવીએ કહ્યું કે, સિમ્સ હોસ્પિટલને અપાયેલી શો-કોઝ નોટિસમાં દર્શાવેલા કારણો હાસ્યાસ્પદ અને પાયાવિહોણા હોવાનું પ્રથમ દ્રષ્ટિએ દેખાઇ આવે છે.

કોવિડ સમયમાં અમદાવાદની તમામ ડેઝિગ્નેટેડ હોસ્પિટલો દર્દીની સારવારની જવાબદારી નિભાવી છે. મ્યુનિ.એ સીમ્સ સિમ્સ હોસ્પિટલને સાંભળ્યા વગર જ હોસ્પિટલને બદનામ કરવાના આશયથી જે શો-કોઝ નોટિસ આપેલ છે, તે તાત્કાલિક પરત લઇને ન્યાય આપવામાં આવે તેવી અમારી માંગણી છે. અમદાવાદ હોસ્પિટલ એન્ડ નર્સિંગ હોમ્સ એસોસિએશન દ્વારા ગુજરાત સરકારને વિનંતી કરવામાં આવે છે કે, આ બાબતે યોગ્ય પગલા ભરવામાં આવે.