કોરોના ગુજરાત:કોરોના કાળના દોઢ વર્ષમાં પહેલીવાર સૌથી ઓછા દર્દી ડિસ્ચાર્જ થયાં, 25 નવા કેસ સામે માત્ર 14 દર્દી સાજા થયાં

કોરોનાની બીજી લહેરનો હવે અંત નજીક છે. બીજી વેવમાં ફરી 20થી વધુ કેસ નોંધાયા છે. 24 કલાકમાં 25 નવા કેસ નોંધાયા છે. જો કે તેની સામે 14 દર્દી સાજા થયા છે. કોરોના કાળના દોઢ વર્ષમાં પ્રથમ વાર જ નવા કેસ કરતાં આટલા ઓછા દર્દી સાજા થયા છે. આજે રાજ્યના 5 કોર્પોરેશન અને 6 જિલ્લામાં જ નવા કેસ નોંધાયા છે. જ્યારે 3 કોર્પોરેશન અને 27 જિલ્લામાં કોરોનાના શૂન્ય કેસ નોંધાયા છે. રાજ્યમાં રિક્વરી રેટ 98.75 ટકા રહ્યો છે. રાજ્યમાં સતત બીજા દિવસે એક પણ દર્દીએ કોરોનાના કારણે જીવ ગુમાવ્યો નથી, 6 ઓગસ્ટે 18 દિવસ બાદ એક દર્દીનું તાપી જિલ્લામાં મોત નોંધાયું થયું હતું.

રાજ્યમાં સતત 15 દિવસથી ડબલ ડિજિટમાં ક્યાંય કેસ નોંધાયા નથી. ઉલ્લેખનીય છે કે, 23મી જુલાઈ સુધી સતત 12 દિવસ સુધી રાજ્યના એક પણ જિલ્લા કે શહેરમાં કેસ ડબલ ડિજિટમાં નોંધાયા ન હતા.

207 એક્ટિવ કેસ અને 6 દર્દી વેન્ટિલેટર પર
રાજ્યમાં અત્યાર સુધીમાં 8 લાખ 25 હજાર 45ના રિપોર્ટ પોઝિટિવ આવ્યા છે, જ્યારે મૃત્યુઆંક 10 હજાર 77 રહ્યો છે. તેમજ અત્યાર સુધીમાં 8 લાખ 14 હજાર 761 દર્દી ડિસ્ચાર્જ થયા છે. એક્ટિવ કેસની વાત કરીએ તો રાજ્યમાં હાલ 207 એક્ટિવ કેસ છે, જેમાંથી 6 દર્દી વેન્ટિલેટર પર છે, જ્યારે 201 દર્દીની હાલત સ્થિર છે.

રાજ્યમાં કુલ એક્ટિવ કેસ અને નવા કેસ

1 જુલાઈથી 8 ઓગસ્ટ સુધી રાજ્યમાં નોંધાયેલાં કેસ, મોત અને ડિસ્ચાર્જના આંકડાઓ

રાજ્યમાં કુલ 825045 કેસ, 10077 દર્દીના મોત અને 814761 ડિસ્ચાર્જ