કોરોના ગુજરાત LIVE:રાજ્યમાં 5 મહિના બાદ એક હજારથી વધુ નવા કેસ, 1101 કેસ સામે 886 ડિસ્ચાર્જ, અમદાવાદમાં એકનું મોત

રાજ્યમાં કોરોનાના કેસમાં ઉછાળો આવ્યો છે. છેલ્લા 24 કલાકમાં કોરોનાના 1101 નવા કેસ નોંધાયા છે. જ્યારે 886 દર્દી સાજા થયા છે. જેમાં અમદાવાદમાં 374 કેસ નોંધાયા છે. આ સાથે રાજ્યમાં કોરોનાનો રિક્વરી રેટ ઘટીને 98.65 ટકા થયો છે. જ્યારે અમદાવાદ શહેરમાં એક દર્દીનું મોત થયું છે. રાજ્યમાં 164 એટલે સાડા પાંચ મહિના બાદ એક હજારથી વધારે કેસ નોંધાયા છે. અગાઉ 14 ફેબ્રુઆરીએ 1040 નોંધાયા હતા.

5995 એક્ટિવ કેસ, 15 દર્દી વેન્ટિલેટર પર
રાજ્યમાં અત્યાર સુધીમાં 12 લાખ 52 હજાર 89ના રિપોર્ટ પોઝિટિવ આવ્યા છે, જ્યારે મૃત્યુઆંક 10 હજાર 965 થયો છે. તેમજ અત્યાર સુધીમાં 12 લાખ 35 હજાર 129 દર્દી ડિસ્ચાર્જ થયા છે. હાલ 5995 એક્ટિવ કેસ છે, 15 દર્દી વેન્ટિલેટર પર છે અને 5980 દર્દીઓની હાલત સ્થિર છે.

જુલાઈ મહિનામાં 18 દર્દીના મોત
આજે 28મી જુલાઈએ અમદાવાદ શહેરમાં એક દર્દીનું મોત થયું છે, જ્યારે 1લી જુલાઈએ વલસાડમાં અને 4 જુલાઈએ મહેસાણામાં 1-1 દર્દીનું મોત થયું હતું. રાજ્યમાં એક સપ્તાહ બાદ 12 જુલાઈએ ગાંધીનગર અને વલસાડ જિલ્લામાં 1-1 મળી કુલ 2ના મોત થયા હતા. ત્યારબાદ 14 જુલાઈએ અમદાવાદ શહેરમાં 1 દર્દીનું મોત થયું હતું. 15 જુલાઈએ અમદાવાદ શહેર અને ભાવનગર શહેરમાં 1-1 મળી કુલ 2 દર્દીના કોરોનાથી મોત થયા હતા. 16 જુલાઈએ રાજકોટ જિલ્લામાં એક દર્દીનું મોત થયું હતું. 21મી જુલાઈએ અમદાવાદ શહેરમાં 2 દર્દીના મોત થયાં હતાં. 22મી જુલાઈએ અમદાવાદ શહેર, સુરત શહેર અને ભાવનગર શહેરમાં 1-1 એમ કુલ 3નાં મોત થયાં હતાં. 23મી જુલાઈએ અમદાવાદ શહેરમાં એક દર્દીનું મોત નોઁધાયું હતું. 25મી જુલાઈએ અમદાવાદ શહેરમાં 2 અને અરવલ્લી જિલ્લામાં 1 દર્દીનું મોત થયું હતું. 26મી જુલાઈએ અમદાવાદ શહેરમાં એક દર્દીનું મોત થયું હતું.

1 જૂનથી અત્યાર સુધી રાજ્યમાં નોંધાયેલાં કેસ, મોત અને ડિસ્ચાર્જના આંકડાઓ

રાજ્યમાં કુલ 1252089 કેસ, 10965 દર્દીનાં મોત અને 1235129 દર્દી ડિસ્ચાર્જ