વાઈરલ તસવીરો:અમદાવાદના કુબેરનગર વોર્ડમાં વૃક્ષોરોપણની જાળીઓ પર કોંગ્રેસના હારેલા ઉમેદવારનું નામ અને બજેટ લખેલા ફોટો વાઇરલ

અમદાવાદ શહેરના કુબેરનગર વોર્ડમાં કોર્પોરેશનની ચૂંટણીમાં કોંગ્રેસમાંથી હારી ગયેલા ઉમેદવાર જગદીશ મોહનાનીનું નામ વૃક્ષારોપણ માટેની લોખંડની જાળીઓ ઉપર મ્યુનિસિપલ કાઉન્સિલર તરીકે હોવાની વિગત સાથેના ફોટો સોશિયલ મીડિયામાં વાઇરલ થયા છે. આ લોખંડની જાળી પર લખ્યું છે, મ્યુનિસિપલ કાઉન્સિલરના બજેટમાંથી વર્ષ 2021-22 જગદીશ મોહનાની. આ વાઈરલ ફોટો હાલ ભાજપ અને કોંગ્રેસમાં ચર્ચાનો વિષય બન્યા છે, અને ચર્ચા શરૂ થઈ છે કે શું ખરેખર તેઓએ આ રીતે જાળી પર નામ લખાવ્યા છે?

કુબેરનગર વોર્ડમાં તાજેતરમાં યોજાયેલી કોર્પોરેશનની ચૂંટણીમાં કોંગ્રેસના ઉમેદવાર જગદીશ મોહનાની હારી ગયા હતા. આ વોર્ડમાં ત્રણ કોંગ્રેસ અને એક ભાજપના ઉમેદવારને ચૂંટણી અધિકારીએ વિજયી જાહેર કર્યા હતા. તેની સામે કોંગ્રેસના ઉમેદવાર જગદીશ મોહનાનીએ હારને હાઈકોર્ટમાં પડકારી હતી. હાઈકોર્ટે પણ આ રિટ ફગાવી દીધી હતી. હાલ સુપ્રીમ કોર્ટમાં મેટર પેન્ડિંગ છે. અમદાવાદ કોર્પોરેશનના વર્ષ બજેટ 2021-2022માં વૃક્ષો માટેની જાળીઓમાં જગદીશ મોહનાનીને મ્યુનિ. કાઉન્સિલર તરીકે બતાવતા ફોટો વાઇરલ થતાં અનેક સવાલો ઉભા થયા છે.