કોરોનાએ સમાજશાસ્ત્ર સુધાર્યું:પાટીદાર, જૈન, રાજપૂત, રબારી, ઠાકોર સહિત અનેક સમાજમાં ઓછા ખર્ચે પ્રસંગ ઊજવવાનો સરાહનીય અભિગમ

સમાજના શ્રેષ્ઠીઓ બદલાવ માટે કટિબદ્ધ

કડવા પાટીદાર સમાજમાં કોરોનાકાળ બાદ ટેલિફોનિક બેસણાનું ચલણ વધ્યું છે. અત્યારે સમાજના લોકો રૂબરૂ બેસણામાં જતા પહેલા ટેલિફોનિક વાતચીત કરીને જે તે પરિવારને સાંત્વના પાઠવતા હોય છે. સમાજમાં હવે 85 ટકા લોકો ટેલિફોનિક બેસણું યોજે છે. અગાઉ બેસણામાં ખૂબ મોટી સંખ્યામાં લોકો જતા હતા. ઓનલાઇન બેસણાથી સમયનો પણ બચાવ થાય છે. > આર. પી. પટેલ, કડવા પાટીદાર સમાજના અગ્રણી તથા વિશ્વ ઉમિયા ફાઉન્ડેશનના પ્રમુખ

લગ્ન પ્રસંગમાં કાગળની કંકોત્રી કે આમંત્રણ કાર્ડને બદલે સોશિયલ મીડિયા પર આમંત્રણ પાઠવવામાં આવી રહ્યા છે. લગભગ 50 ટકા લોકોએ આ અભિગમ અપનાવ્યો છે. તેનાથી સમય સાથે નાણાંનો પણ બચાવ થાય છે. લગ્નમાં પણ મર્યાદિત લોકોને આમંત્રણ પાઠવવામાં આવે છે. બેસણું પણ ટેલિફોનિક કે ઓનલાઇન યોજવાનું ચલણ વધ્યું છે. છેલ્લા એક વર્ષથી અનેક લોકો ઓનલાઇન બેસણું યોજી રહ્યા છે. > ભદ્રેશભાઇ, જૈન સમાજના અગ્રણી

રાજપૂત સમાજમાં છેલ્લા બે વર્ષ દરમિયાન 50 ટકા લોકો દ્વારા ટેલિફોનિક કે ઓનલાઇન બેસણાં યોજવામાં આવી રહ્યા છે. લગ્ન પ્રસંગમાં પણ પ્રિન્ટેડ કંકોત્રીના બદલે વ્હોટસએપ કે અન્ય પ્રકારના સોશિયલ મીડિયાના માધ્યમથી આંમત્રણ પાઠવવામાં આવે છે. સમાજમાં આગામી દિવસોમાં સામૂહિક લગ્નોમાં વધારો કરવામાં આવે તે બાબતે વિચારણા કરવામાં આવી રહી છે. > વિજયસિંહ ચાવડા, પ્રમુખ રાજપૂત સમાજ તથા મહાકાલ સેના

વ્યક્તિના મૃત્યુ પછીની વિધિમાં અનેક પરિવારમાં બદલાવ આવ્યો છે. કોરોનાકાળ દરમિયાન માત્ર ઘરના લોકોની હાજરીમાં જ બારમાની વિધિ કરાતી. અંતિમ 10 થી 12 દિવસની જે વિધિ હોય છે તેમાં ઘટાડો જોવા મળ્યો છે. 40 ટકા લોકો માત્ર બારમાની વિધિ કરે છે. > પ્રવીણભાઇ ઠાકોર, સમાજ અગ્રણી

પાટડી, વિરમગામ, સમી અને રાધનપુર પંથકના 102 ગામોએ લગ્ન અને મરણ પાછળ થતો તોતિંગ ખર્ચ બચાવીને એ રકમ શિક્ષણ, કન્યા કેળવણી અને સામાજિક સુધારા પાછળ વાપરવાનું શરૂ કર્યું છે. અગાઉ પરિવારની વહુનુ પલ્લુ ભરતી વખતે 25-30 તોલા સોનાની વસ્તુ મૂકવામાં આવતી હતી, જે હવે 7 તોલા જ મૂકાય છે. સગાઇ અને સીમંત વખતે મર્યાદિત લોકોને જ બોલાવવમાં આવે છે. > જેસિંગભાઇ ચાવડા, નાડોદા રાજપૂત સમાજ

તલોદ તાલુકાના હરસોલ ગામે બાવીસા પરગણા રોહિત સમાજની બંધારણ સમિતિએ મૃત્યુ પ્રસંગે શોકની સાડીઓ, પ્રેત ભોજન અને છાજિયાં કુટવાનો કુરિવાજ બંધ કરી બેસણું રવિવારે 11 થી 2 સુધી કરવાનું નક્કી કરાયું હતું. અન્ય પ્રસંગોમાં સાડી અને પેન્ટપીસ આપવાની પ્રથા, લગ્નમાં બેન્ડ કે ડીજે પાછળ ખોટા ખર્ચ પણ બંધ કરાયા. કોરોનાકાળમાં દરેક સમાજે પરંપરાગત રિવાજ ત્યજી દીધા છે. > ડૉ. એચ. કે. સોલંકી, સમાજના અગ્રણી