ઠંડીનો પારો:આજે વાદળિયું વાતાવરણ, 4 દિવસ ડબલ સિઝન રહેશે

વેસ્ટર્ન ડિસ્ટર્બન્સની અસરથી અમદાવાદ સહિત રાજ્યનાં મોટા ભાગનાં શહેરોના તાપમાનમાં વધારો થતાં ઠંડીમાં ઘટાડો થયો છે. તેમાંય અમદાવાદના મહત્તમ અને લઘુતમ તાપમાનમાં 10 ડિગ્રીનો તફાવત રહેતાં દિવસ દરમિયાન લોકોએ ગરમીનો અનુભવ કર્યો હતો. જોકે આગામી 24 કલાકમાં અમદાવાદ સહિત રાજ્યના વિવિધ વિસ્તારોમાં વાદળિયું વાતાવરણ સર્જાવાની શક્યતા હવામાન વિભાગે વ્યક્ત કરી છે.

હવામાન વિભાગના આંકડા મુજબ, વેસ્ટર્ન ડિસ્ટર્બન્સની અસરથી અમદાવાદના લઘુતમ તાપમાનમાં સોમવારે એકસાથે 6 ડિગ્રીનો વધારો થયો હતો તેમ જ મંગળવારે પણ લઘુતમ તાપમાન 2 ડિગ્રી વધ્યું હતું. આમ અમદાવાદનું લઘુતમ તાપમાન બે દિવસમાં 8 ડિગ્રી વધી 21.3 ડિગ્રી પહોંચ્યું છે, જ્યારે મહત્તમ તાપમાન સામાન્ય કરતાં 2.2 ડિગ્રી વધી 31.5 ડિગ્રીએ પહોંચતાં શહેરમાં બપોર પછી લોકોએ ગરમીનો અનુભવ કર્યો હતો.

આગામી ચાર દિવસ દરમિયાન અમદાવાદમાં ધૂપ-છાવનું વાતાવરણ રહેવાની સાથે ઠંડીનો પારો 19થી 21 ડિગ્રીની આસપાસ રહેવાની શક્યતા હોવાથી શહેરમાં ડબલ સિઝનનો અનુભવ થવાની શક્યતા છે.જ્યારે આગામી બે દિવસ દરમિયાન દક્ષિણ ગુજરાત, સૌરાષ્ટ્રના કેટલાક વિસ્તારોમાં ઝાપટાં પડવાની શક્યતા છે.