દેશમાં પ્રથમ:ગુજરાત હાઈકોર્ટ અપ્રત્યક્ષ સુનાવણીનું જીવંત પ્રસારણ કરતી દેશની સૌ પ્રથમ હાઈકોર્ટ, સુપ્રીમ કોર્ટના ચીફ જસ્ટિસે વર્ચ્યુયલ કોર્ટનું ઉદઘાટન કર્યુ

ગુજરાત હાઈકોર્ટ આજથી અપ્રત્યક્ષી સુનાવણીનું જીવંત પ્રસારણ કરતી દેશની પહેલી હાઈકોર્ટ બની છે. હાઈકોર્ટની કાર્યવાહીનું જીવંત પ્રસારણનું સુપ્રીમ કોર્ટના ચીફ જસ્ટિસ એન.વી. રમન્નાએ વર્ચ્યુઅલ ઉદઘાટન કર્યું હતું. ન્યાય પ્રક્રિયામાં સુધારો અને ન્યાય આપવાની દિશામાં ગુજરાત હાઈકોર્ટનું જીવંત પ્રસારણ સાથે જ ઓપન કોર્ટ તરફનું ઐતિહાસિક પગલું છે. તેમ ચીફ જસ્ટિસ એન.વી રમન્નાએ જણાવ્યું હતું.

લોકોને ન્યાય પ્રક્રિયામાં વિશ્વાસ વધુ મજબૂત થશે
ચીફ જસ્ટિસ એન વી રમન્નાએ વધુમાં જણાવ્યું હતું કે, લાઈવ સ્ટ્રિમિંગથી જજ પર દબાણ વધશે પરંતુ જનપ્રિય અભિપ્રાયથી લોકોને વિમુખ રાખવા જોઈએ. લાઈવ સ્ટ્રિમિંગની આ પહેલથી લોકોમાં જસ્ટિસની ટ્રાન્સપરન્સી રહેશે.લોકોમાં ન્યાય પ્રક્રિયાનો વિશ્વાસ વધુ મજબૂત બનશે.

સોમવારથી બાકીની કોર્ટના લાઈવ સ્ટ્રિમિંગ થશે
ગુજરાત હાઈકોર્ટના આઈટી વિભાગના રજિસ્ટ્રાર અશોક ઉકરાણીએ જણાવ્યું હતું કે, 26 ઓક્ટોબર 2020થી ફર્સ્ટ કોર્ટ પ્રોસિડીગ ઓનલાઇન જોવા મળતું હતું. ઓપન કોર્ટ માટે 2018માં સુપ્રીમ કોર્ટે ચૂકાદો આપ્યો હતો. ગુજરાત હાઇકોર્ટ યુટ્યુબ ચેનલને 48 લાખ વ્યૂ મળ્યાં છે. ગુજરાત હાઇકોર્ટ ચીફ જસ્ટિસ અને અન્ય જસ્ટિસે અન્ય કોર્ટનુ પણ લાઈવ સ્ટ્રિમિગ કરવા નક્કી કર્યું છે. દેશમાં પ્રથમ ગુજરાત હાઇકોર્ટે આ શરૂ કર્યું છે. સોમવારથી બાકીની કોર્ટના લાઈવ સ્ટ્રિમિગ થશે. ચીફ જસ્ટિસ ઓફ ઈન્ડિયાએ ઉદઘાટન કર્યું છે. ગુજરાત હાઇકોર્ટની વેબસાઇટ પર પણ લિંક મળશે. ફિઝિકલ કોર્ટ શરૂ થશે ત્યારે પણ લાઈવ સ્ટ્રિમિંગ ચાલુ રહેશે. નાગરિકો ઘરે બેઠા કોર્ટની તમામ કામગીરી, દલીલો, ચૂકાદા જોઈ- સાંભળી શકશે.

ગુજરાત હાઈકોર્ટમાં વર્ચ્યુઅલ માધ્યમથી સુનાવણી
ઉલ્લેખનીય છે કે અપ્રત્યક્ષ સુનાવણીનું જીવંત પ્રસારણ કરનાર ગુજરાત હાઇકોર્ટ સમગ્ર દેશમાં પ્રથમ છે કે, જેણે યુટ્યુબ ચેનલ ઉપર અપ્રત્યક્ષ સુનાવણી શરૂ કરી હતી. વર્ષ 2018માં સ્વપ્નિલ ત્રિપાઠી VS સુપ્રીમ કોર્ટના જજમેન્ટ આધારે નિર્ણય લેવાયો હતો. જેમાં 26 ઓક્ટોબર 2020થી યુટ્યુબ ચેનલના માધ્યમથી ગુજરાત હાઇકોર્ટ ચીફ જસ્ટિસની ખંડપીઠેની કાર્યવાહીનું જીવંત પ્રસારણ શરૂ કર્યું હતું. આજે 17 જુલાઈએ ભારતના મુખ્ય ન્યાયમૂર્તિ એન. વી.રમના વર્ચ્યુઅલ માધ્યમથી ગુજરાત હાઇકોર્ટના નવા નિર્ણયનો શુભારંભ કરાવ્યો છે.

ચીફ જસ્ટિસની બેન્ચના કેસોનું લાઈવ સ્ટ્રિમિંગ
ગુજરાત હાઇકોર્ટના ચીફ જસ્ટિસે તેમની સમક્ષના કેસોની સુનાવણી પ્રાયોગિક ધોરણે 26 ઓક્ટોબર 2020થી યુ-ટ્યુબ ઉપર લાઈવ શરૂ કરી હતી. ગુજરાત હાઇકોર્ટ તેની કાર્યવાહી ઓનલાઇન યુટ્યુબ ઉપર સ્ટ્રિમિંગ કરી રહી છે. ગુજરાત હાઇકોર્ટના ચીફ જસ્ટિસ વિક્રમનાથની અદાલત તેમની બેન્ચ સમક્ષના કેસો યુટ્યુબ ઉપર લાઈવ સ્ટ્રિમિંગ કરી રહી છે.

પ્રાયોગિક ધોરણે યુ-ટ્યુબ પર સ્ટ્રિમિંગ થતું હતું
કોરોના મહામારીના કારણે લોકડાઉન બાદ ગુજરાત હાઈકોર્ટમાં કેસોની વીડિયો કોન્ફરન્સ મારફતે સુનાવણી હાથ ધરવામાં આવી રહી છે. ત્યારે સુપ્રીમ કોર્ટના નિર્દેશ પ્રમાણે ગુજરાત હાઈકોર્ટની વીડિયો કોન્ફરન્સની સુનાવણી હવે લોકો યુટ્યુબ પર પણ જોઈ શકે છે. પ્રાયોગિક ધોરણે ચીફ જસ્ટિસની કોર્ટની સુનાવણીનું યુટ્યુબ પર લાઈવ સ્ટ્રિમિંગ શરૂ કરાયું રહ્યું હતું.

કોર્ટની વેબસાઈટ પર લિંક મૂકવામાં આવે છે
ગુજરાત હાઈકોર્ટ દ્વારા બહાર પાડવામાં આવેલા પરિપત્રમાં જણાવવામાં આવ્યું છે કે, વીડિયો કોન્ફરન્સથી થતી સુનાવણી દરમિયાન ઓપન કોર્ટ કન્સ્ટેપ્ટને લાગુ કરવામાં આવ્યો છે. જેથી જે વ્યક્તિને કેસની સુનાવણી જોવી હોય તે વીડિયો કોન્ફરન્સથી થતી કોર્ટની કાર્યવાહી લાઈવ યુટ્યુબ પર જોઈ શકશે. કોર્ટની વેબસાઈટ પર તેની લિંક આપવામાં આવી છે.