બ્રિજના નામકરણનો વિવાદ:નરોડા રેલવે ઓવરબ્રિજનું નામ સંત રોહીદાસબ્રિજ રાખવા ભાજપના સાંસદ ડો.કિરીટ સોલંકીએ પત્ર લખ્યો, છતાં નામ બીજું રાખી દેવાયું

અમદાવાદ3 મહિનો પહેલા
  • નરોડાના સ્થાનિક દલિત સમાજ દ્વારા છેલ્લા એક વર્ષથી સંત રોહીદાસ રેલવે ઓવરબ્રિજ નામ રાખવા રજૂઆત કરાય છે
  • સાંસદ ડો.કિરીટ સોલંકીએ દ્વારા પત્ર લખવામાં આવ્યો છતાં પણ ધારાસભ્ય અને રજૂઆતને ધ્યાનમાં રાખવામાં આવી

શહેરના નવનિર્મિત નરોડા રેલવે ઓવરબ્રિજના નામકરણને લઇ અને વિવાદ ઉભો થયો છે. રેલવે ઓવરબ્રિજનું નામ સ્થાનિક દલિત સમાજના સંત રોહીદાસના નામે રાખવા દલિત સમાજની અનેક સંસ્થાઓ અને પશ્ચિમ લોકસભાના ભાજપના સાંસદ સભ્ય ડો.કિરીટ સોલંકી દ્વારા મ્યુનિસિપલ કમિશનરને પત્ર લખી અને સંત રોહીદાસ ઓવરબ્રિજ નામકરણ કરવા રજૂઆત કરવામાં આવી હતી. ભાજપના સાંસદ સભ્યએ પત્ર લખી રજુઆત બાદ પણ મ્યુનિસિપલ કમિશનર અને ભાજપના જ શાસકોએ સાંસદ સભ્યને પણ ગાંઠયા નહિ. સ્ટેન્ડિંગ કમિટીમાં તાકીદના કામોમાં સરદારનગર વોર્ડના કોર્પોરેટર કંચનબેન પંજવાણીની દરખાસ્તને ધ્યાને રાખી નરોડા રેલવે ઓવરબ્રિજનું નામ સતગુરુ સ્વામી ટેઉરામજી મહારાજ રેલવે ઓવરબ્રિજ રાખવા મંજૂરી આપવામાં આવી હતી. આગામી દિવસોમાં દલિત સમાજ દ્વારા આ મામલે વિરોધ પણ નોંધાવવામાં આવશે.

'હું અત્યારે દિલ્હી છું': ડો.કિરીટ સોલંકી
પશ્ચિમ લોકસભાના સાંસદ ડો.કિરીટ સોલંકીએ દિવ્યભાસ્કર સાથેની વાતચીતમાં જણાવ્યું હતું કે, નરોડા રેલવે ઓવરબ્રિજના રોહીદાસ ઓર બ્રિજ નામકરણ કરવા અંગેના પત્રનો મ્યુનિસિપલ કમિશનર કે કોર્પોરેશન તરફથી પ્રત્યુત્તર આપવામાં આવ્યો હોય તેવું લાગતું નથી છતાં પણ મારે જોવું પડશે હું અત્યારે દિલ્હી છું અને વ્યસ્ત હતો તેના કારણે મારા ધ્યાનમાં નથી.

ઓવરબ્રિજના નામકરણને લઈને રજૂઆત
સરદારનગર વોર્ડના ભાજપના મહિલા કોર્પોરેટર કંચન પંજવાણીએ દિવ્ય ભાસ્કર સાથેની વાતચીતમાં જણાવ્યું હતું કે, નરોડા રેલવે ઓવરબ્રિજનું નામકરણ સતગુરુ સ્વામી ટેઉરામજી મહારાજ રાખવા માટે અમારા ધારાસભ્ય બલરામ થાવાણી અને મેં પણ રજૂઆત કરી હતી અને ગત ગુરુવારે મળેલી સ્ટેન્ડિંગ કમિટીમાં તાકીદના કામમાં ઠરાવ મંજૂર કરવામાં આવ્યો છે

નામકરણ માટે એક વર્ષથી રજૂઆતો કરીએ છીએ: કિરીટ મકવાણા
બહુજન સંઘર્ષ સમિતિના પ્રમુખ કિરીટભાઈ મકવાણાએ દિવ્ય ભાસ્કર સાથેની વાતચીતમાં જણાવ્યું હતું કે, છેલ્લા 50 વર્ષથી અમે નરોડા રેલવે ઓવરબ્રિજની નજીક રહીએ છીએ. 50થી 60 ટકા જેટલી બે પેઢીથી દલિત સમાજની વસ્તી નરોડામાં છે. સ્થાનિક લોકો અને દલિત સમાજની માંગણી હતી કે, નરોડા રેલવે ઓવરબ્રિજનું નામકરણ સંત રોહીતદાસ બ્રિજ રાખવામાં આવે. એના માટે અમે છેલ્લા એક વર્ષથી મ્યુનિસિપલ કમિશનર, મેયર, સાંસદ સભ્ય અને મુખ્યમંત્રી સુધી રજૂઆત કરી હતી. જોકે ત્રણેક દિવસ પહેલા અમને જાણવા મળ્યું હતું કે કોર્પોરેશનમાં સ્ટેન્ડિંગ કમિટીમાં સરદારનગર વોર્ડના કોર્પોરેટર કંચન પંજવાણીના દરખાસ્તની સાથે આ બ્રિજનું નામકરણ બીજું રાખવામાં આવ્યું છે. આ અમારા સંતનું અપમાન છે જે ચલાવી લેવાશે નહિ. આગામી દિવસોમાં તેનો વિરોધ યથાવત રહેશે.

દલિત સમાજ દ્વારા વિરોધ કરવામાં આવશે
અમે તથા અમારા દલિત સમાજની સંસ્થાઓ દ્વારા છેલ્લા એક વર્ષથી બ્રિજનું નામકરણ સંત રોહીદાસ રાખવા માટે પત્રો લખ્યા અને અમને બાહેધરી પણ આપવામાં આવી હતી. પરંતુ હવે બીજું નામ બદલી નાખવામાં આવતા અમે બ્રિજ પર સંત રોહીદાસ ઓવરબ્રિજ નામનું બોર્ડ લગાવી દીધું છે. પશ્ચિમ લોકસભાના સંસદસભ્યો ડો.કિરીટભાઈ સોલંકી જેઓ દેશના સાંસદ સભ્ય છે. તેઓએ પણ મ્યુનિસિપલ કમિશનરને પત્ર લખી જાણ કરી હતી. છતાં પણ બ્રિજનું નામ રાખવામાં ન આવ્યો નથી.બ્રિજનું નામકરણ સંત રોહીદાસ ઓવરબ્રિજ ન રાખવામાં આવતા હવે દલિત સમાજ દ્વારા આ મામલે વિરોધ કરવામાં આવશે.

બ્રિજ સંપૂર્ણપણે તૈયાર, પણ ઉદ્ઘાટન બાકી
નરોડા રેલવે ઓવરબ્રિજ બનીને તૈયાર થઇ ગયો છે. નરોડા અને તેની આસપાસના રહેતા લોકોને છેલ્લા બે વર્ષથી આ બ્રિજ બંધ હોવાના કારણે ભારે મુશ્કેલીનો સામનો કરવો પડી રહ્યો હતો. બ્રિજ હવે સંપૂર્ણપણે બનીને તૈયાર છે પરંતુ બ્રિજનું ઉદ્ઘાટન કરવામાં હજી પણ વિલંબ તથા તેવી શક્યતાને પગલે સ્થાનિક રહીશો દ્વારા આ બ્રિજનું બે દિવસ પહેલા જાતે લોકાર્પણ કરી દેવામાં આવ્યું હતું અને બીજું નામ પણ સંત રોહીદાસ ઓવરબ્રિજ રાખવામાં આવ્યું હતું.

સ્થાનિક રહીશો દ્વારા આ બ્રિજ ચાલુ કરી દેવામાં આવતા તાત્કાલિક ધોરણે બીજા દિવસે સવારે બેરીકેડ મુકી અને બંધ કરવામાં આવ્યો હતો અને મ્યુનિસિપલ કોર્પોરેશનના ભાજપના પ્રભારી ધર્મેન્દ્ર શાહપુર બિલ્ડીંગ કમિટીના ચેરમેન મહાદેવ દેસાઈ અને નરોડા સ્થાનિક કોર્પોરેટરો, અધિકારીઓ તાત્કાલિક બ્રિજ પર પહોંચ્યા હતા. રેલવે ઓવરબ્રિજની કામગીરી નું નિરીક્ષણ કરી અને જે કામગીરી બાકી હોય તે ઝડપથી પૂરી કરવા માટે અધિકારીઓને સૂચના આપવામાં આવી હતી.

અન્ય સમાચારો પણ છે...