અમદાવાદ જિલ્લા પંચાયતની ચૂંટણી:ભાજપે જિલ્લા પંચાયતમાં 16માંથી 12 ઉમેદવારને કાપ્યા, કોંગ્રેસમાંથી આવેલા એકપણ પક્ષપલટુને ટિકિટ નહીં

અમદાવાદ જિલ્લા પંચાયતના ભાજપના ઉમેદવારોની પસંદગીમાં પ્રદેશ પ્રમુખ અને ધારાસભ્યોનું પ્રભુત્વ દેખાય છે. ભાજપે ગઈ ટર્મના 16માંથી માત્ર 4ને ટિકિટ આપી છે. કોંગ્રેસના એક પણ પક્ષપલ્ટુને ટિકિટ મળી નથી. ટિકીટ ફાળવણીથી નારાજ આગેવાનો પોતાના પરિવારજનોને અપક્ષ તરીકે ચૂંટણી લડાવે તેવી શક્યતા છે.

ભાજપે ગેરરીતિના આક્ષેપનો સામનો કરતાં અન્નપૂર્ણા ચુડાસમાના પતિ દિગપાલસિંહને ધોલેરા બેઠક અને સામાજિક ન્યાય સમિતિના સભ્ય રેખા કાંતિ લકુમને કાવીઠા બેઠક પરથી રિપિટ કરાતા કાર્યકરોમાં ભારે રોષ ઉઠ્યો છે. આ સિવાય સૂરજિતસિંહ ગોહિલના સ્થાને તેમના પત્ની અલ્પાબા ગોહિલને હડાળા બેઠક અને અજમલ બારડને વિરોચનનગર બેઠક પરથી રિપિટ કરાયા છે.

ઉમેદવારોની પસંદગી માટે વિરમગામ, સાણંદ, માંડલ, દેત્રોજની બેઠક માટે વિરમગામ ભાજપના આગેવાનો, સાણંદ અને બાવળામાં સાસંદની ટીમ, ધંધુકા, ધોળકા, ધોલેરામાં ધારાસભ્યો અને દસક્રોઇના ઉમેદવારો માટે પણ બે ધારાસભ્યોએ ઉમેદવારોની પસંદગી કરી છે.